夏桑菊羅漢果茶

依排小小豬成日都擦眼睛，我諗都可能係熱氣，所以就煲涼茶俾佢清一清先啦~

其實開頭我都唔知煲咩好，去相熟嘅藥材店買煲湯料時同個店員傾開，佢就教我煲夏桑菊羅漢果茶。

所以我就即時買左十蚊夏桑菊料同一粒羅漢果返屋企煲啦~

夏桑菊係可以清肝明目同埋清熱氣，我之前都煲過，不過當時係用片糖作調味。店員話用羅漢果嚟煲仲可以帶出個功效，所以就試下啦！

先夏桑菊料清洗，然後浸15分鐘~

羅漢果洗淨壓碎~

煲內放入約3L凍水，將所有材料放入去一齊煲~

待煲滾後，轉慢火煲1.5小時~

待涼後就可以過濾入樽，就可以飲用啦~

之前都試過煲加有羅漢果嘅涼食俾小小豬飲，不過當時佢都唔多肯飲。但今次可能有啲菊花嘅香味，所以雖然杯涼茶係黑卒卒咁，小小豬都肯飲呀，仲話啲菊花茶好飲添！ 

後記：我俾小小豬連續飲左三日，每日午餐及晚餐各一杯，明顯依幾日擦眼睛嘅情況少左，便便又多左，VV又密左，我估都應該啲涼荼嘅功效，等我都煲多啲俾佢地兩父子清清熱先得！