【食譜】方便易整～日式生薑燒豬肉飯

新年大吃大喝、又過埋情人節一切都應該回復平淡。

連晚餐都應該要回復平淡，尤其過節煮到天昏地暗都好，應該要煮返啲容易煮又快的。

我最拿手煮日式牛肉飯，但大少爺要減少食牛肉可以怎麼辦？

就轉整 日式生薑燒豬肉飯，一樣係一碗過，碟都唔需要用多隻。

味道又幾好，起碼包包唔知食了薑，其實適量食薑係好的，可以去濕驅寒。

奈何小朋友未必接受到，幸好包包鍾意食呢個飯呢～

我唔太鍾意食豬肉，但都愛上呢個飯。

重點：易煮30分鐘內攪掂！忙住吃喝玩樂行街都趕到回家煮咁囉，哼。

食譜：

豬肉片    一盒

薑蓉      2茶匙(如果喜歡薑味或食到辣可以加到一湯匙)

洋蔥      半個

醬油或生抽  3湯匙

味醂        3湯匙

糖          2茶匙

熱水         50ml

做法：

1. 豬肉片我買呢種，晌一田或Aeon都會有方便又平

2. 磨定薑

3. 將豬肉片用少許糖及豉油撈一撈

4. 先爆香豬肉及洋蔥，豬肉只需要半熟便可

5. 薑蓉、醬油、味醂、糖、熱水撈勻備用

6. 爆香洋蔥、加入醬汁煮滾再放豬肉回鑊煮至豬肉熟透及沾滿醬汁便可以上碟或放上飯面

7. 加隻溏心蛋就更perfect