【食譜】化身魔術師！日式麻糬薯餅

今日失驚無神包包放假一日，「佢快樂過生活 我拼命去生存   幾多人位於山之巔俯瞰我的疲倦」。

既然佢晌屋企，連茶點都由我包辦。

就整過令佢好歡喜但又容易整既「日式麻糬薯餅」。

無錯！佢煙煙韌韌其實都只係薯餅。

材料：薯仔及片粟粉，而片粟粉其實係馬鈴薯粉。

但當中又有啲化學作用令佢煙韌，加上個醬汁，那個抗植物的包包都要添食！

媽媽除了係騙子仲係魔術師，隨時變出好味食物，哼～

*片粟粉係馬鈴薯粉，功用同生粉一樣，令質感更好。

食譜：

薯仔     一大個

鹽     少許

片粟粉    3湯匙

醬汁：

醬油       半湯匙

味醂       半湯匙

糖           半湯匙

水           半湯匙

*醬汁材料撈勻

做法：

1. 薯仔切粒粒蒸 30分鐘

2. 用匙壓爛至薯蓉

3. 趁熱加入鹽及片粟粉撈勻

4. 做成餅型

5. 煎至金黃色香脆

6. 倒入醬汁食薯餅上色就可以喇，之後加片紫菜