【食譜】繽紛色彩！芒果脆蝦

近日開始見到芒果，對於好鍾意食芒果既我同包包真係為之瘋狂。

當然我除咗就咁食之外仲會諗下整乜好。

於是就試下用芒果去配虎蝦，完全係摷雪櫃而來。

覺得蝦係可以好多不同配搭又通常唔會錯。

如果用肉類去配，好多時醃肉改變命運，用錯醃法就完全兩回事。

但蝦最多咪落鹽，除非你落得太多變成死海咁鹹，否則唔會點錯的。

今次呢個嘗試都唔錯，做法又簡單又唔需要太多調味呢～

芒果脆蝦食譜送比大家。

做法：

1. 先講脆蝦，我用盒裝虎蝦去殼去腸再索用少少生粉同鹽摔洗

2. 跟住索乾晒水，放返入雪一小時

3. 煎之前用半隻蛋白加片粟粉或生粉或粟粉撈勻就可以煎

4. 平底鑊油溫要夠熱 ，煎時灑少少鹽調味

5. 芒果汁可以用一個芒果打汁，再留d芒果肉切粒加入

6. 加幾滴檸檬汁、少少鹽(好少)煮熱

7. 最後加少少生粉水煮成獻汁就可以淋上蝦面喇喇喇