（網上圖片）
有啲保險公司，強調佢地係做Premium Financing為主，而唔係賣普通嘅CI或者saving plan，話係想將Premium Financing呢種複雜嘅財技平民化，佢地係背後嘅大力推手咁話。有人認為保險係多餘，無錢嘅唔想洗錢嚟買啲宜家用唔著嘅服務，有錢嘅覺得唔需要買因為自己根本大把應急錢處理所有突發需要，結論係：保險無用。但係，識玩嘅就會用小小錢，買份保險產品做抵押，套錢嚟做啲高桿杠高回報嘅財務規劃，賺息差，轉錢套錢變現樣樣都夠flexible。有膽，有全盤計劃策略，有腦，就可以做到。你唔可以成日話人地死好命，就解釋晒所有野。
有朋友做直銷，發展得唔錯，佢講過，財務自由當然係人都想達到啦，但係唔係個個都肯先犧牲後攞野。如果你唔係堅想做，又或者無智慧唔識揀公司、制度、產品、培訓嘅話，你根本無可能成功。佢話佢過左三年非人嘅生活，先發展到宜家嘅下線規模，啲錢唔係整個app就會變到出嚟。
你諗吓，真正嘅財務自由，一方面駛錢慳啲少個零，另一方面賺錢又多個零，一來一回，存左咁多年嘅錢，就算宜家即刻停止工作，收入少左嘅情況下，都仲可以過好多好多日嘅生活。你可以話，有啲人唔駛點犧牲，都可以得到好多野，例如你將一個上市公司主席個女私有化左，一畢業就結婚，之後外父就送左間屋比你，同埋隨便安排左你入去佢公司做見習經理，咁就突然財務自由左嘞。又例如，你本身只係一個finance manager，因為老闆唔想出面、其他ED唔夠資格、其他人又有criminal record，所以你就被棒做左主席，年薪過千萬，咁就突然財務自由左嘞。又又例如，你早幾年前聽左老死Benny同Albert講，玩玩吓買左幾百個果啲唔知咩咩咩coin，今年屎忽痕打開個戶口睇睇吓睇到呆左，多左好幾個零頭呀，OMG，開心過阿仙奴贏波呀，咁就突然財務自由左嘞。又又又例如，你個做廠起家、八九十年代去左賣quota發左達嘅叔父，晨早入左new zealand籍，叫你過去幫手打理吓佢啲生意，咁樣就財務自由左嘞。又又又又例如，你去澳門玩百家樂，贏左幾千萬返香港，買左十幾個單位收租，每個月淨租金收入都有成二、三十萬嘅，yeah，正呀，咁就突然財務自由左嘞。又又又又又例如，你上網拍野直播吓自己唱歌食野訓覺屙屎跳舞打機，突然紅左日日有成百萬個人睇你啲片，送公仔助養你，咁樣就財務自由左嘞。又又又又又例如，……well，其實，呢啲雖然係exceptional case嚟架，唔可以異常當成常態去睇，一兩單野嘅sample size咁細，點可以偏概全呀……不過，至少啲人都有付出吖，唔係坐係度咩都唔做。
個問題係，李嘉誠退休就專心搞自己個慈善基金，你退休就開始收嚟自慈善基金嘅善款，邊個叻啲呀？做政黨主席定上市公司主席？邊個銜頭過癮啲呀？問吓袁彌明先。成日話人地死好命，葡萄人地做人頭，食到個勢靠好運，well，起碼人地有實業堅係做緊，先比人睇中相中個B去玩吖，唔似你吹足幾年都未起動過做任何野吖。當然，做唔做到、做唔做好，無人知；但係，開唔開始做，你隨時可以決定。先選擇，之後揀時機，最後睇結果：OK就繼續， 唔OK就撤退，就係咁簡單。你與其羨慕人地有做，點解唔檢討自己無做/唔肯做？
你可以繼續堅持自己果套，不過，堅持嘅同時你都可以採納吓人地嘅意見。當你睇到cambridge analytica同facebook單野，你都仲會認為只有大陸嘅微信先會misuse你啲數據？當你見到一個民選嘅生意佬做左總統之後所做嘅野，你開始分唔到，其實佢同菲律賓或者北韓果種嚇你一驚嘅處事方法，其實無咩分別。不過，起碼佢肯選，仲選左唔止一次，所以先做到總統。宜家嘅野，係佢應得嘅狀態。你唔滿意嘅，咪打擊佢、取代佢囉，或者，can't beat 'em join them，成為佢政權嘅其中一員囉。
做過先講，同未做過講，係唔同。做得普通，同做得成功嘅人所作出嘅評論，邊個有參考價值多啲，可以自行判斷。
