（網上圖片）
好多理想同道理，細個你覺得理所當然；到後來大個，後知後覺果陣先知道，「咩原來係咁架咩、原來係咁玩架？」好出奇呀？傳統智慧出左問題唔work，究竟係「傳統」因為outdated嘅問題，定係「傳統智慧」本身嘅設定係有問題呢？
你以為提供最好服務嘅航空公司係最好賺？No，其實係每杯水每個餐每件行李都同你計住計住又超賣又差啲就打死你嘅廉航同托運，先係最賺錢嘅。企係街邊鋪賣小食魚蛋豬大腸成25蚊串但只係收現金仲一日開足24小時cash不停入所以要每日分兩三轉打數入銀行、60蚊剪個髮10分鐘搞掂一日剪成百幾個頭只收八達通連穿柜桶底嘅機會都無嘅cash cow生意，真係犀利。同朋友講笑話，好多野，其實係假象，表面係一樣，內裡係另一樣；做商務中心你以為好高檔咩，其實講賺錢能力，可能比唔上一檔魚蛋鋪、或者賣茶鋪。宜家，連賣茶都可以賣到上市嘅時代，咩「傳統智慧」所謂嘅「一分耕耘一分收穫」(你今日買左咩crypto/ICO呀？我日日掘「一分」錢啲coin好過啦！)、「做最好嘅服務先能夠賺錢」(你睇吓澳牛、九記？)、「聖誕鐘買匯豐」(你當內房內險內銀吉利騰訊死架？！)、「細個唔讀書、大個做運輸」(哈哈，幾廿年前點知網購會興起、物流會咁重要啫；如果，我有間圓通、順豐，我唔介意做死一世運輸囉，甚至幾世都可以考慮吓呢……)
你見到有人炒期指每日搵嘅錢多過你一個月嘅人工、銀行隨時打電話嚟話有筆110萬嘅loan等住你嚟借、住service apartment全包仲唔駛煩個冷氣要洗個去水位會塞、返大陸搵幾個同鄉賣幾份保險穿州過省玩吓食吓訓吓就TOT幾球野年薪之餘仲有時間搞吓其他side b，但原來佢只係中七畢業，連大學都無讀過？Damn it，有無搞……錯！你呢個正宗香港三大大學畢業生，由細到大聽住阿媽話唔讀書無前途，聽到對方嘅發跡之後，會唔會心理唔平衡呢？有無後悔十年前去左讀大學去exchange做internship再跟手讀埋個wet9 master，竟然都唔及買騰訊call騰訊然後咩都唔做只做廢人等足十年就得嘞。個一刻，你知道，「傳統智慧」，根本係bullshit，根本係之前成功左嘅人幻想出嚟但宜家已經用唔著嘅經驗。
呢度係香港，唔係utopia，仲要中西交匯，啲人出出入入，啲錢洗洗轉轉，全世界最大嘅市場、又狼又古惑又善變又多錢嘅對手、超瘋狂作風嘅企業、最強硬又有性格又有豐富爭鬥經驗嘅政權，就在我地旁邊。如果我地唔變強，宜家就玩完，比人食左；如果變強啲，頂多幾廿年，起碼都仲有餐飯食吓。因為，在強者嘅世界眼中，係根本唔需要你呢個弱者，連襯托呢個資格你都配唔起呀。
仲不停消費舊有嘅傳統智慧，而唔去發展、認同吓啲新理論，永遠記住周星馳唔去睇吓農夫、唔睇AI fintech ICO只睇匯豐，個世界仲會進步嘅？
「智慧」，係應該帶比你解決問題嘅能力和方法、或者一啲可以啟示你去正確思考問題嘅概念，而絕對唔會係一堆限制左你諗法同想像力嘅固有stereotype。如果你連智慧同廢up都分辨唔到嘅話，你都唔好做人嘞。電視劇都有講啦，夠賤、利益永遠行先、世界無永遠敵人，幾時都係行走江湖嘅principles。發財立品，唔係立品發財，先後次序，唔好搞錯。切記感情用事，包括處理感情事。心態強悍，重要過實力強橫。身邊點都要有個馬基尼利、ZaZa、Rodman做吓dirty work先得。門當戶對，木對木，竹對竹，有錢溝明星，少錢約ptgf/ptbf，窮嘅看AV，訓街嘅有左右手。千祈唔好妄想你可以咁易入到位，雖然，做過parking好過no show，不過，記住，人頭唔易做，RO唔好做，過figurehead嘅人生，未必過癮。得閒換些朋友，見吓故友，約吓舊友，圈子決定你嘅視野，有錢跟有錢傾真金，打機跟打機傾積分，礦友同礦友傾token。失業破產妻離子散，定自由健康時間同錢都樣樣有齊，未必係你自己可以決定嘅，大環境你控制唔到，但最重要嘅係風險管理，無可能risk-free，但係盡量要low risk & no fear。「Love Actually」套戲入面經典對白「Say no to drugs, coz you'll get it for free」非常hilarious，因為你之前打生打死嘅野，到最後好可能會get it for free。記住記住記住，放下放下放下，適當時候可以斷捨離，亦可以窮追猛打，睇情況執生。終極智慧，成王敗寇，winner/playmaker/莊家/利益揸fit人話事主宰主導世界，選舉戰、企業管理爭奪、家庭、歷史發展、運動比賽，全部都係，訊息記載一定會被distorted有偏差，唔好信晒全部。世上無童話，everything does have a clause，唔好傻啦，童話只係一首歌，而傻佬就有大把。
傳統智慧唔會再有架啦，因為，連幾個鐘頭前出果個post都已經比幾分鐘前出嘅野overshadow左即刻沉左底嘞，仲有啲咩係經得起時間考驗而又唔會比人遺忘嘅呢？
