（網上圖片）
做人做事做生意，IQ、EQ、FQ，智商、情商、財商，邊樣最重要？智商高，做管理做決策最好； 情商高，做Operation同CS因有同理心最好； 財商高，做財技做追數做管數最好，最有能耐。不過，加埋晒，如果無practice wisdom，始終都係差啲啲嘅。
有朋友話曾經同城中李氐家族傾生意，對方第二號人物在會議室時，當住其他人面前，同我朋友講：「sorry，我地姓李嘅，係唔會、亦唔需要同人傾生意嘅。」最後，單deal以一個對朋友來講不太理想的價錢成左。因為，佢係CS人，一遇到殺價，就無力招架，唔太識反駁。
有朋友做美容產品批發同美容服務生意，年幾前曾批過一批價值港幣約五萬蚊的產品比一間公司，對方收貨後唔肯找數，拖拉左成年，無論點追，追極都追唔到，可謂無賴便無敵。最終，朋友要搵人幫手，七折收數，雖然拿少左，但點都比一蚊都無為好。最終，一個hea左成年幾都未處理好的問題，只要搵到方法，幾日就搞掂左。
有商會朋友以前係banker，退左落黎之後，近年投資左成幾百萬，同友人合資搞左個佔據成兩層、好有規模、同裝潢好唔錯的酒庫、餐廳同商務中心，可惜營運左成年，成績始終未如理想，雖然硬件一流，但始終最欠人流，而生意又一般般，管理同人事方面，亦有麻煩同挑戰。最後，惟有把心一橫，將商務中心賣左比人頂手，酒庫加餐廳就縮小規模來做，試吓頂唔頂到，見步行步咁啦。其他人都話唔明佢，一個財商高又而聰明、管開幾億portfolio都可以駕馭自如嘅人，點會衰係一個「所謂」咁細嘅project手上呢？不過，佢自己知，做marketing同operation，完全唔係佢果範，畢竟，自己坐房睇住份死嘅財務分析報表，同坐住水吧前面將椅、跟餐廳經理討論吓個menu設計和客人對食物嘅feedback，根本完全係兩種技能，唔識就係唔識，搞唔掂就係搞唔掂，以為用傳統所擁有嘅智商情商財商，來做一門新野而又可以輕易成功的話，太樂觀吧。
睇新聞見到，大陸有在銀行工作的投資者，幾年前私人投資在一個P2P借貸平台，全輸之後，他爸賣樓、問人借錢集資嘗試幫佢還債，點知都係搞唔掂，自殺身亡。最後，他在大學工作做副系主任嘅阿爸，因失去兒子的悲痛，都選擇自殺，離開呢個世界。對佢來講，一個經過計算、投入一項世界所認可而又有發展空間、唔係水人害人的項目，竟然令到自己同屋企人要一齊食屎執屎，愧對親朋，果種入心入肺入肉入腸的歉疚，係成世人都在comfort zone裡打滾的人，永遠都唔會明白嘅事。最近ICO超興，買賣幣、做交易平台、自己做ICO、做sales等，所衍生出來的服務商同機會，愈來愈多。有人非常討厭話肯定係騙局，有人卻在密密trade密密出貨入貨，更有人身體力行投資幾百萬做隻ICO認認真真賭一局，可能win，可能total loss。不過，所有做高風險野嘅人都認為自己唔會係接最後一棒嘅人。智商情商財商高嘅人，通常有能力判斷究竟呢樣野值唔值得做同個operation plan點玩；不過，有智慧嘅人，對掌握幾時大做幾時少做、應唔應該忍手更有經驗，輸嘅機會大大降低。
自問自己嘅智商、情商、財商都一般般，智力正常，無咩耐性，高深的財技也只懂一點點，所以之前通常被人搵笨多。當然，比人搵笨得多之後，戒心alertness大左，亦都小心謹慎左，判斷力都因為揩多左野，經驗累積提升唔少！所以，每次識新朋友談新項目，少不免吹水摸底，唔係點樣知對方虛實呢？總而言之，關係幾好都唔可以盡信，只信事實同數據；rationale幾宏大公司係咪500強title係咪director同president都唔可以盡信，只計掂確信ROI就可；唔好只一味聽人由頭講到尾比人帶住走，一定要問問題同亂入、搵返自己嘅節奏，睇對方臨場反應、個雞籠有幾堅有幾硬。
機會同錢無左可以搵返可以創造，但係，對自己嘅信心無左，咁就一世嘞。
智力。智慧。經驗
