【食譜】鮮味十足！鮮蠔煲仔飯

年初五(1月5日)祝大家蠔食、蠔買、蠔情、蠔門總之乜都蠔。

今日個食譜係：鮮蠔煲仔飯！早幾日睇到黃伊汶個IG，見到佢做蠔飯好吸引於是我就試，材料做法有少少分別咁。

而且天氣來緊又話會凍，咁又係出動煲仔時候，當然煲仔飯通常都較肥膩。

呢個鮮蠔煲仔飯個重點係無咁肥膩，如果大家唔想用煲仔煲可以用電飯煲去煲。

我要呃like當然係用煲仔啦~加上我個人唔怕麻煩(但至怕人煩)，咁用煲仔煮都唔係好難。

其實用廣島蠔最好又鮮味又肥美，可惜我屋企得包韓國蠔。

韓國蠔都鮮味但縮水比較利害，大家可以就自己方便同需要便可以。

先煮個上湯，我用昆布、日本醬油、味醂、薑蓉、清酒去煮湯再放蠔烚一烚，用呢個湯去煮個飯當然好食啦。

材料：

蠔    隨自己喜歡，我就用晒一包韓國蠔大約12隻

米    1嘜

上湯：

昆布   1條(先沖洗再剪碎)

薑蓉    少許

大蔥    適量

日本醬油   1湯匙

清酒       2湯匙

味醂       2湯匙

鹽         少許

水         500ml

做法：

1. 將蠔洗淨備用

2. 500ml水加入昆布，昆布浸軟後就加薑、大蔥、醬油、清酒、味醂煮滾

3. 煮滾後細火煮15分鐘
 
4. 加入蠔入上湯中，大約1分鐘就夾起蠔肉(唔好烚咁耐)

5. 米洗淨後加上湯(照平時煮飯份量便可以)

6. 放入煲仔用中火煲至米水收

7. 就將蠔放入煲內小火煲5分鐘,熄火唔好開蓋再焗多8分鐘便完成

*如果用電飯煲就晌米收水後放蠔繼續煲