【食譜】脆魚～椒鹽鮮鮑魚

12月係好忙碌，經常諗住聖誕其實冬大過年。

我都有諗過今年做冬煮乜，大少爺就話一定要羊腩煲。

但我點都要試下新菜式孝敬大家，正所謂我唔食個blog都要食。

一直想識試整椒鹽鮮鮑魚到底煮完會唔會變硬呢？原來又唔會。

而且煎得夠香仲有少少脆個質感最好味，做法容最但叫做唔使下下都蒸鮮鮑。

除新鮮鮑魚，罐頭或乾鮑都唔建議咁做，一來罐頭鮑本身個質感同味道都唔同、乾鮑由浸至發都唔容易當然要炆先可以得到最好味道。

新鮮鮑魚價錢平但清洗功夫又唔少得，除了洗外其他步驟跟本就無乜難度，所以呢個一定要寫比大家。

正所謂你快樂所以我快樂，哼～

食譜：

新鮮鮑魚 6隻或你想要幾多就買幾多

蒜頭   5粒剁粒粒

辣椒   2隻

蔥白   1條切粒粒

芫茜少許

鹽或椒鹽   1/4茶匙

生粉少許

做法：

1. 首先鮑魚要起肉去膽用牙刷刷洗乾淨再界格仔花紋

2. 將鮑魚同鮑魚殼放落滾水煮，鮑魚肉就煮1分鐘，個殼(用來裝飾)就煮幾分鐘，鮑魚肉及殼都抹乾水份備用

3. 鮑魚沾上生粉，用熱鑊熱油，油一定要夠熱去煎鮑魚煎至金黃色盛起備用

4. 蒜粒，辣椒、蔥白、芫茜粒爆香，蒜粒炒至微金黃色就加鹽

5. 再放鮑魚回鑊兜勻便完成

6. 鮑魚煮好後可以放回已經鮑魚殼內上