（網上圖片）
「喂，近來有咩搞呀？」電話另一邊，傳來一把既熟悉又生疏的聲音。
「妖，賣樓囉，做commercial呀，仲有海外樓呀，泰國、馬來西亞之類啦，你明啦……咁你又有咩搞呀，有盤放咩？」
「係呀，出來食早餐詳談啦！下個星期三啦，得唔得呀？」
「頂，係唔係晨咁早去酒店，食個早餐，又要自我介紹又要派片又收幾廿張卡片果啲呀？唔想去啊，起唔到身啦，又悶又唔知為咩……」
「放心啦，唔係果啲呀，得我同你咋，不如去荔枝角MX食啦！」
「好，幾時？」
「下星期三，朝早9點，長沙灣廣場附近啦。」
「妖，長沙灣定荔枝角呀，頭先又話荔枝角食？」
「頂，咪係荔枝角地鐵A出口果個長沙灣廣場囉！你咪去錯呀！」
「OK，就咁啦！」
「Bye！到時見！」
「……噢，喂，咪住先……」
「咩料？」
「你頭先講果件貨，係咩黎呀？」
「有件工商、有件residential，你做邊瓣吖？」
「咩都做，不過太細額的話，要同其他人合作搞，咁就窄啲啦……」
「一間在大角咀，樓花，想賣；另一間在天水圍，近新北江，想租。有無計呢？」
「無問題，同你搞啦！不過，唔一定出到貨呀！」
「明啦，有難度，唔包生仔吖嘛！」
「話時話，你有無買bitcoin，升到核爆呀！」
「妖，一個幣都無買呀，睇唔明，睇唔通，又唔知幾時爆，所以無買，點知會升到離晒地吖！」
「我都係……勁後知後覺囉……」
「咁你有無買700、175、3333、1918呢幾隻野吖？佢地都升到飛天啦……」
「仲好講，我買果啲全X部唔識行，仲衰X過曼聯泊大巴，死守呀！買中板塊但買唔中隻野，仲衰過唔買呀！！心理唔平衡呀！！」
「我有隻2007，點知內房未升完前就賣左，超後悔。之後，仲high左幾隻野，賺左果啲都嘔突添呀……頂，勁失望呀！」
「妖，咁不如唔好食早餐，去happy hour好過啦！」
「唔得呀，要飲少啲呀宜家…」
「點解呀？」
「肥吖嘛，我宜家少左打波，間唔中仲會做吓HIIT，食得健康啲，少油少甜少炸……」
「妖，你做咩野呀，就死啦你？」
「未住，不過我怕死吖嘛……你都要開始Keep吓啦，你估你仲細咩，三張野有多啦……」
「OK，下星期見啦！」
「得，拜！」
就係咁，開始左幾個星期都會見吓面的早餐會。除左波車女樓股之外，都仲可以講吓健康、人生、想法而又無hidden agenda在背後的人，買少見少，必需要份外珍惜，因為能遇上的愈來愈少機會了。
