（網上圖片）
近幾個月，常在唔同場合做唔同類型的workshops，包括有教育中心、大學持續進修教學中心、商會演講廳及商務中心，題目則計有marketing手法、口才演講技巧、微信推廣的重要、startup同fundraising的關係、股票同資本市場的運作等等之類，雖然好多、好雜，不過內容好實在，少理論多實證。不過，每當去到幾個特定的環節時，通常我都會按捺不住，例如主持人出來過場講野的時候、觀眾於FAQ時間問野果時、facilitator在做分享會帶嘉賓遊花園果時……
之後，我愈來愈發覺，唔計專業知識同行業實際運作的獨門技巧分享之外，好多人都會忽略、忽視左幾種非常重要、卻又被人看輕的技倆(唔知係刻意定唔覺意呢？又或者成日認為自己一定識唔駛學啦)，它們分別係：
清晰表達重點技巧、問significant問題/提問技巧、公開演說技巧(上台出來用咪講野果種)。
第一，表達得好，可以令你下達指令時清晰啲，游說他人時把個人立場企得強硬一啲，推銷時令自己有自信有說服力多一啲，安撫別人時把感受講得有條理一啲，無論做野交朋友兩公婆對仔女對上司下屬客人在公在私方面，將說話講得清楚、明白，層層推進，點都係好事。
第二，問問題問好啲，會令你得到好多額外的資訊，亦會比人覺得你有頭腦、有料、轉數快，好似有記者尋根究柢的精神。我見過有朋友作為聽眾，在研討會FAQ時間問其中一位嘉賓問題，無奈他講左3、4分鐘，台上的嘉賓都唔明佢想問咩野，仲似個人感受分享多過問問題，就連主持人想reframe條問題，都無從入手，最後嘉賓唯有笑笑口，作一啲正路的回應就算，搞到果位朋友好無癮。所以，你話，唔識問問題，少左得到有用資料，少左個表演機會，幾浪費呀！
第三，在公眾場合能夠駕馭到演講，做個令人難忘的speech，可以令你魅力頃刻間提升，政客、明星、官員、管理人員，莫不需要上乘的口才，先能夠達成既定目標，例如，用動人的說話來打動人投票、買票入場睇show、說服投資者比錢、感染下屬為公司賣命等等。
有口才的庸才，你可以話佢係死剩把口。有口才的大將之才，就真係堅嘞，因為佢的魅力、領導力、感染力肯定有番咁上下。
