（網上圖片）
近來，新舊經濟股輪住來上市，炒上炒落，財演演出機會不斷，有廠有電競有網上賣服務同賣文字收IP；而且市場上，仲有大堆共享xx系列排住隊等上，由單車到單位、由co-working到co-living，由服務到人的租賃與配對，都可以一齊共享/分享/互動/交流：由一夫多妻或一妻多夫，到ptgf或ptbf的泛濫程度，再到DBA或MBA的食字變化成為A5或O2的明目張膽自介，變的不只是business model咁簡單，而係人心、習慣、文化，通通都唔同左。因為variable唔同左，所以，舊formula已經唔work啦，算唔出既有的output。
虛擬經濟有樣好，就係，你唔隊佢，由佢膨脹，佢就會慢慢吹大變大坐大，因為好多人會依附著佢地維生或靠佢地在資本市場上翻生，無人想佢死睇佢衰。不過，邊D係堅，邊D係流，在虛虛實實之間，在新舊經濟/business model交替之中，褪去、卸下外面所刻意裝上的marketing makeup之後，的確涵蘊著唔多唔少唔想比人瞭解透徹的秘密。
比如電競股，即是靠賣hardware維生，無論賣高中低級的設備，都即係hardware，即是生產商OEM，講到尾即係工業股，係有故仔吹的工業股。當然，如果搞比賽搵到sponsor、出埋自家game出埋character收埋IP錢賣到多D點數，咁當然仲好啦！又比如網購股，即係賣野啦，做網店仲要唔駛自己生產，叫其他人自己開account自己管理，平台只負責管理交易、物流同抽水部份，借力打力，係無得輸的model。雖然，retail同sales channel的人手被後台order management的專業人員替代曬，講到尾，其實網購最重要的環節係IT同物流之間配合，根本就係技術水平夠高的運輸公司。又例如，主要產品係放在酒店房間裡面、專做出租智能手機的Tink Labs，背後股東有富智康，雖然橋同pitch係新，但其實它的主要目的都係以擴大sales channel為主、以幫生廠商出貨為實的推銷公司，把手機這硬件B2B行銷至全世界各地。好似，老麥以賣burger為名實質搞地產同franchise，面同底果浸，可能係好唔一樣呢！
所以，好多公司宜家都所謂「不務正業」，因為大家都唔知所謂的正業，仲可以捱幾耐唔死，或者本業過幾年之後仲存唔存在。究竟堅做虛業、hea做實業好；定堅做實業、hea做虛業好呢？資源夠的話，兩條腿、幾條腿走，一定無問題呀！恆大賣樓之外，都會搞波賣水做文化事業，再用財技做deal引資又托價，咪OK囉！講到最尾，實業定虛業都無所謂，只要有人信、肯信、願意繼續信，就會有希望！資本市場，永遠會為動聽的故事、有魅力的傻佬、有得做的世界，提供源源不絕的支持。
