韓劇最大嘅特色就係靚人靚景，令人心動嘅靚仔靚女，配搭甜蜜滿分嘅浪漫情節，的確好容易令觀眾投入劇集當中，甚至乎幻想自己係劇中嘅男女主角。
咁到底點先算係韓劇精？如果以下5種行為都中晒，唔使唔認，因為好肯定你就係喇！
1. 輕鬆背台詞
每套韓劇都有經典台詞，聽到上半句，諗都唔使諗就接到落去嘅話，唔使問都知你係超級劇迷啦！
2. 每睇一套劇都換一次老公
每套韓劇嘅男主角都有完美嘅身高同五官，每位都散發住截然不同嘅氣質，要溫文書生定係暖男oppa，甚至係成熟溫柔嘅大叔系都得，得咗。難怪每睇一套劇都要成為唔同人嘅太太！
3. 超級入戲
完全被劇中情節牽動，緊貼主角嘅喜怒哀樂、同悲同喜，的確係每個資深劇迷必有嘅條件。
4. 每次重播都再睇一次
先係緊貼韓國播映時間睇一次，到有本地電視台播嘅時候又睇一次，到自己諗返想睇又煲多一次，電視重播又再返睇，呢個簡直係永世不滅嘅循環。
5. 親身去劇中場景
當睇住電視都滿足唔到大家嘅時候，就梗係要飛去韓國，親身感受劇中嘅場景。企喺現場，再諗住相應嘅情節，內心嘅激動真係無法以筆墨形容！
（圖片來源：tumblr）
