做朋友，好少直接講「我地係朋友」。因為，穩固的關係，不用、亦不會經常說出口。愈刻意強調、煞有介事地說出口，愈是有問題。等於，有錢、生得靚、有才華的人，愈唔會同人強調自己有錢、生得靚同有才華一樣。
不過，朋友的定義，人人唔同；有些人，vendor當partner、同事當朋友、party friend當摰友、game友用來交心、波友當生死之交，可惜，到最後，先發現，原來對方根本唔係同自己一樣咁諗，最後，變成兩頭唔到岸，兩面不是人，感覺仲好唔過癮呢！
我好少同一齊工作做野的人做朋友，因為，工作歸工作，玩還玩，我相信，真的需要分開，減少麻煩，管理都方便啲。均真一點好，雖然唔係話一刀切，不過都盡量想分開，利益當前，人必有私心，必會動氣，必有爭執和心病，必會有權責邀功問題。當然，好傾的，能一齊work with，過程都會好開心呢，不過，萬中無一的事，唔好覺得係routine，而係bonus。
細個讀書果陣，我曾在馬會電話投注部做兼職，識左好多同事、朋友，當時曾經有位幾好傾的男同事，年齡同我差唔多，有日問我借一千幾百蚊，你諗吓，讀書果時，仲要成16、17年前，一千幾百蚊都夠我用大半個月交通和使費，當時諗左一陣，因為好傾，所以我決定借。之後，故事可以想像到，就係：他消失了，再也找不到他。
我傷心，係因為失去情誼，高估關係，多過失去啲錢。
大個之後，借錢的朋友，通常都有借有還，當然，有三催四請的，也有自動波的，也有間隔性失蹤的。後來，當你知道這是人的常態，便不會那麼戒心重、過份介懷了。當然，有些人，覺得你老馮要對佢好、要就佢、要講呟佢鍾意聽的話，OMG，仲慘過做account servicing，因為做account servicing起碼都有錢收呀……
共享的東西，現在隨處可得。宜家連Freelance的工作都可以在fiverr找到、伴侶也可以在CMB或happn找到，將來唔通連友誼這種東西，也要交易出來，儲存夠token才可以換個有質素的伴？
