（網上圖片）
人有好多遺憾和不足，遺憾令人不安、不足令人成長，這兩樣東西我都擁有過、經歷過。
例如，我當時，年紀小，沒有好好讀書，沒有好好感受世界，沒有好好去愛人，沒有好好去訓練意志與體能，所以，知識與智慧離我而去、感受也消失了麻木了殆盡了，愛的人也走了，堅強的意識與健康的身體也在苟延殘喘。
宜家，大個了，功利了，所有野都係關社政經事，沒有好好做足研究，沒有好好掌握出貨時間，沒有好好調教自己的心態，投資不夠順利了，個倉縮小了，對沖也做足了。所以，宜家的遺憾，都多是關乎經濟錢銀上的事，身邊人的遺憾，多的是：果時最衰賣個的士牌賣早左啦、果時應該唔去投資搞印刷走去買層樓好過啦、唔係為左對仔女要移民去外國由頭來過其實係香港我地一早就已經上左岸啦……當然，亦有關乎情的，例如，早知唔去旅行就可以陪埋婆婆最後一面啦、早知一早應該同佢和好如初啦點知佢有病呀……
有些遺憾可以彌補，有些不足可以消弭。但，有些遺憾與不足，可跟你一世。
前幾日，同朋友食飯吹水，講左分享左好多人生睇法。例如，朋友A同老公係中學同學，不過小時候雙方都唔熟，到大家中學畢業各散東西後，到大學畢業，之後出來社會工作，才在中同聚會再次相遇，之後就好順利地拍拖、結婚，估唔到係認識左十幾年之後，竟然才會開始這段姻緣。而朋友B年輕時，都曾經有過一個差不多拍了十年拖的結婚對象，奈何最後因為性格和家庭唔太夾，就同這擁有一些所謂「港女」特質的女孩始終work out唔到而分手，一直到宜家三十差不多到尾，也未有結婚打算。如果B沒有分手的話，宜家可能已經係幾個小孩子的老豆啦，諗諗吓，B其實自己都想過，這是遺憾定正確呢？
宜家，個問題唔係去愛or not去愛，亦唔係點去愛或者愛幾耐，而係點樣可以一直無遺憾咁行落去，仲要係行果陣時雙方都感到舒服。
兩個人、生多件、三口子、連工人、四個人、兩家人、幾十人，一齊生活左幾年之後，已開始發覺後悔，身邊果個原來唔係right candidate。然後再過多幾年之後，先再次發現原來果陣時早就應該離開，宜家先愈來愈後悔，到最後，先發現，先醒過來，原來所謂人生最大的遺憾，係自己造成，係因為當時唔夠勇氣，做抉擇。
離開or not離開？主動的遺憾和被動的遺憾，你會點揀？
