【縮胃手術】世界第一肥童速減20公斤

好多老一輩覺得小朋友肥肥白白先有福，不停畀嘢食去塞肥佢，但其實好多嘢都要講求平衡，太肥或太瘦對健康都唔好。

印尼就有一名被譽為「世界第一肥」嘅10歲男童，因為太肥而健康出現問題而需要減肥，近日就進行縮胃手術，終於成功減去超過20公斤啦。

呢名世界第一肥童阿里亞（ARYA PERMANA），年紀輕輕但有成190公斤，一餐可以食到兩個大人嘅份量。由於太肥，令佢無衫褲可以著得落；另外，因為體形問題，令佢行路都出現問題，無辦法返學。日前，家人見佢越來越肥，健康又開始響起警號，決定為佢減肥！起初父母同醫生選擇以節食方式幫佢減重，禁澱粉、禁高糖、節食及多食蔬果，可惜4個月只減得9.5公斤，於是家人決定要阿里亞去做縮胃手術，上月完成手術後至今，阿里亞已經減去20公斤，父母期望兒子可以一年內減去約42公斤，咁到時就真係可以放下心頭大石啦！

目前醫生已經為佢制家一套活動計劃同飲食餐單，為降低佢嘅飢餓感，更為佢減少「飢餓荷爾蒙」（ghrelin），亦每週監督住阿里亞嘅體重進度。過度肥胖好容易引致內分泌及內臟功能出現問題，肥到好似阿里亞咁，要減成正常體重都需要啲時間，所以家長平日都要睇實小朋友飲食狀況，唔好太放任呀！

圖片及資料來源：Tribun Timur、Facebook Page《Arya Permana》