前排佢仲同你好開心傾偈、不斷揾你，彷彿呢段關係打風都吹唔甩、大家可以一直走落去，但突然間所有嘢都唔同晒，對方變得退縮、抽離、遙遠，兩個人嘅感情搖搖欲墜，你由之前嘅滿有信心到呢刻變得好驚，怕佢會徹底離開自己。

事情到咗呢步其實都仲有得救，但首先你要了解到底對方因為咩而對呢段感情意興闌珊，正視問題癥結所在，再好好解決！

1. 怕失去自由

男人都怕被拘束，當一段關係發展得愈熱烈，甚至令佢覺得可能會發展到「一生一世」嘅階段，呢個時候佢可能就會突然覺得害怕，驚因此而令佢被逼放棄現有嘅自由同鍾意做嘅事，所以就想逃避、一走了之。呢個時候，只要講明你唔會打破佢現有享受嘅生活模式，通常就可以解決到問題。

2. 無諗住結婚

如果一個男人話唔想亦無打算結婚，唔好覺得你可以令佢改變主意。當對方無咁嘅諗法，而你又好想結婚嘅話，你應該move on揾個同你有一樣諗法嘅男人，而唔係繼續糾纏喺目標唔一致嘅對象度。

3. 人生目標唔一致

如果只係小問題，兩個人都可以盡力去磨合，但當喺人生目標、生唔生小朋友、宗教模式，或者生活模式等呢啲重大議題上有分歧時，就未必可以妥協到。即使你兒家同佢喺埋一齊有幾咁開心，長遠落去嘅話你哋之間都係有解決唔到嘅問題。唔好逃避或者覺得對方會改變，要記住勉強無幸福。

4. 唔滿意兒家嘅職業或發展路向

事業對男人嚟講非常重要，當佢喺事業上遇到挫折或迷失方向，佢好可能就會諗中止兒家呢段感情嚟騰出時間去解決問題。女人其中一個最嚴重嘅錯誤係當男人工作上遇到問題時，仲要催逼對方用更多時間陪伴同留意自己。男人嘅自信好多時都取決於事業成功與否，所以唔好不斷挑戰工作喺男人心目中嘅地位啊！

5. 佢感覺到你對未來有好多構想

女人比男人對將來往往有更多嘅幻想，即使你無直接講明，但其實男人都可能感覺到無形嘅壓力。所以最好嘅辦法就係首先你要揀一個會希望結婚嘅男人，之後就唔好畀任何壓力佢。當佢感受唔到壓力，自然就唔會覺得要結束呢段關係。

6. 佢想暫且撇開激烈嘅情感，好好休息一下

無錯愛上一個人係件好奇妙嘅事，但男人唔似女人咁終日糾纏喺情感風暴之中，佢哋經歷完激烈嘅情感後都習慣會抽離，呢個正正係點解好多男人激情過後會選擇離開嘅原因。抽離唔代表佢唔愛你，只係希望將注意力轉移一下去其他事情上，之後再返嚟你嘅身邊。

7. 家庭壓力

當兩個人去到談婚論嫁嘅階段，你唔止係同對方，而係同佢整個家族結婚。如果你同佢屋企人不嬲都唔太夾，去到結婚呢個問題上男方就會面對極大嘅壓力。當遇到咁嘅情況，男人或者就會為咗屋企人而選擇放棄你。

8. 你唔係佢長遠一齊嘅對象

如果你感覺到你喺佢心目中只係隨意一齊嘅對象，而佢無考慮過同你嘅將來嘅話，記住問題唔係出自喺你身上，嘗試講出你對呢段關係有咩睇法，同埋希望將來嘅路點樣走落去，否則佢只會覺得你同佢諗法一樣，都只係想玩玩吓。

（圖片來源：tumblr）