男人喺尋找伴侶嘅時候有咩條件？雖然人人要求可能唔同，但大部人都會覺得男人係受下半身支配嘅動物，眼裡面特別鍾意啲身材勁爆嘅女人（如果唔係點會睇咁多AV？）。
但原來事實未必係咁！根據美國德州大學嘅心理學研究發現，男性喺尋找穩定伴侶嘅時候，對女性嘅身材反而唔太著重，反而會將焦點放喺外貌上！
呢項研究總共有375個大學生參與。研究人員會畀一啲異性嘅照片測試者，再問佢哋覺得同呢位異性係適合發展短期抑或長期嘅關係。跟住就問測試者如果畀佢揀長期交往嘅對象，佢會選擇先睇異性嘅身材定係外貌，當中75%嘅男性都選擇先睇樣，只有25%表示想先睇身材；相反，假如係揀短期交往對象嘅話，51%測試者都指會先睇身材，先睇樣嘅就只有49%，比數大為降低。
專家經過分析後指，咁嘅結果原來係同進化論有關！因為當發展一段長期而又穩定嘅關係時，男性好自然會關心下一代嘅基因夠唔夠好，所以佢會想揾一個外表出眾啲女人，希望同佢一齊繁衍天生基因良好嘅小朋友。但如果只係短期關係，男人嘅天性就會比較著重下一代嘅數量，所以會揀身材更惹火、感覺更容易受孕嘅女人。
男人揀伴侶睇身材樣貌都唔係一件驚奇事，但原來咁樣揀唔係只係為自己享受，而係為下一代嘅發展大計著想！想講……真係辛苦晒喎！
（圖片來源：the trent、tumblr）
