【食譜】自家製心機菜！百花釀魚肚

初七日我正式開工，又重回不停覆email、不停比人催交draft。

大少爺都正式開工，我又再成為包包「日間唯一的玩具」。

除了以上總總當然要正式煮晚餐，早幾日表妹來拜年，佢同舅母居然諗到買魚肚比我。

我見到包魚肚當然不停去諗煮乜好，最後想整百花釀魚肚，個蝦膠都係自己攪的，因為出面買既蝦膠用機攪唔好食。

有時間當然自己攪啦！再加個上湯獻汁。

大少爺喜歡之餘，包包都話個蝦膠好食(佢人仔細細已經識分好食同唔好食)。

食譜：

魚肚   4塊  另備：薑、蔥、少許白醋

蝦   半斤 +鹽 1/4、生粉 1茶匙、 麻油  少許

雞湯    250ml

鹽   少許

薑絲   少許

生粉水   適量

蟹子或紅蘿蔔蓉  隨意(用來裝飾)

蛋白    少許

做法：

1.先發魚肚，魚肚用水沖一沖，用薑、蔥、白醋加落水度煲滾，放魚肚入滾水3-5分鐘就盛起

2.盛起後榨乾水切件備用

3. 做蝦膠，我本身會買定啲游水蝦放冰格，所以將蝦解凍後就去殼去腸。

（大家可以好似我咁，買定啲蝦趁佢郁時就放冰格，咁啲蝦就會夠爽身。如果新鮮買回來去剁蝦膠就會無咁彈牙，用冰鮮蝦都可以的。）

4. 將蝦完完全全索乾水。

5. 再用刀拍扁，逐隻拍到如下圖，將所有蝦拍扁後就用刀剁幾下(三兩下便可以)。

6. 加入鹽、生粉及麻油，用筷子順一方向攪。

7. 攪到咁上下就將佢撻30-40下，每次撻都用手先撈一撈，等佢唔同方位都撻得到。

8. 撻到起膠後就放入雪櫃再雪佢半小時以上。

9. 將魚肚灑上少許生粉，再釀蝦膠上魚肚面，又可以加少許蟹子或蘿蔔蓉做裝飾備用。

(唔好蒸住，做埋跟住個步驟)

煮上湯獻汁：

10. 切啲薑絲倒入雞湯煮滾加少許鹽，用少許份量倒入已經放了魚肚既碟中

11. 等魚肚吸收雞湯味道後就蒸15-20分鐘

12. 另外既雞湯就可以加入生粉水煮成獻汁，可以加少許雞白攪勻

13. 最後淋上蒸好既魚肚上

*用雞湯，由於過年間無晒自己熬既雞湯，所以我買了盒裝有機雞湯(無咁多化學劑同味精)。