你對隨便同人發生性行為有無感到抗拒呢？相信好多人嘅答案都會傾向負面。但不認不認還須認，原來根據統計，有超過8成嘅大學生都承認有同人發生過一夜情！

另外，經常都會聽到喺一段穩定關係中嘅性愛益處多多，例如會改善心肺功能、減輕焦慮同壓力、增加免疫力等。雖然一樣係做愛，但對於一夜情等隨便同人發生性行為嘅情況，普遍嘅研究都指咁會令自尊心降低、情緒低落，而呢個情況喺女人身上就特別明顯。研究指男人通常會慨嘆自己錯失咗性愛嘅大好機會，但女人反而會對自己隨便同人上床感到自責同後悔。

加拿大一個研究就揾咗138個女性同62個男性，而佢哋都曾經試過同人隨便發生性行為。結果顯示，男人感到後悔嘅理由竟然係床上對手唔夠吸引，女人就相反會感到自責同羞愧。

但其實如果係做足安全措施同人發生性行為，咁到底同穩定伴侶做愛，定係喺出面同人有一夜情，同樣都係做愛啫，兩者嘅好處同壞處係咪真係分別咁大呢？

針對美國大學生嘅研究結果就顯示，部份男女喺隨便發生性行為之後都有失落、寂寞同被利用嘅感覺，但就有另一部份人覺得咁做帶來嘅正面情緒比負面嘅多。

一個針對832名大學生嘅研究中，當中有50%男性發生一夜情後感到正面，但相對女人就只係得26%。相反，接近1半嘅女性受訪者都對呢次經驗感到負面，男人有同樣感覺嘅就只得26%。

原來有幾項因素會影響同一夜情有關嘅負面情緒，包括對象係認識少於24小時嘅人、事前醉酒或吸毒，同埋事後希望或認為自己有責任同對方認真發展。但有趣嘅係，如果嗰一次係令自己好享受同滿意嘅性愛，咁後悔嘅機會反而就低好多。

而紐約康乃爾大學嘅一名心理學學者就提出相反嘅意見，佢認為一夜情反而會令人提高自信心、更享受性愛嘅愉悅，同埋滿足到自己嘅慾望。佢指出一項涉及2萬名大學生嘅研究結果反映當中有78%嘅男性同42%嘅女性喺對上一次嘅一夜情中獲得高潮。呢種獲得快感上嘅強大差異，可能就解釋到點解男女對一夜情嘅感覺分別咁大。但學者警告，如果你係在乎或者想同對方再見面嘅話，就千奇唔好同佢隨便上床喇，因為咁樣絕對會影響你哋之間關係嘅發展！

（圖片來源：tumblr）