一段戀情走到終結已經令人心碎，如果對方仲要喺完全唔適合嘅時間或場所同自己提出分手，嗰種痛真係會刻骨銘心，一世都難以忘懷……畢竟大家都曾經相愛，就算分手都應該好嚟好去，一定要避免下列10個情況啊！
10. 飲醉酒時
醉酒時講分手會令對方唔知你係講真定講假，只會俾人一種唔認真同玩玩吓嘅感覺。其實每一段感情都係好寶貴嘅，就算要結束都應該要好好尊重。
9. 旅行期間
明明前幾日仲一齊好親蜜咁去唔同嘅地方玩得好開心，但突然間對方就同自己講分手，呢種感覺真係好似被人捧上天堂之後，一下狠狠咁掟落地獄。
8. 喺充滿回憶嘅地方
如今分手嘅地方竟然係以前滿載甜蜜回憶，甚至係戀愛萌芽之地，你話幾咁諷刺。所以為咗減輕對方嘅痛苦，都係唔好同時賦予一個地方咁多「特別意義」啦。
7. 社交網絡上公開分手
感情本來係兩個人嘅事，但對方竟然粒聲唔出就擺上公眾檯，惹起唔少人七嘴八舌咁討論，咁樣不但極度唔尊重對方，亦顯出你本人係幾咁幼稚，咁大個人仲利用感情事「求關注」。
6. 當身邊有親朋戚友嘅時候
兩個人嘅私事一但好似拿開咗肚皮俾人睇咁，情況就會變得極其尷尬，唔知點樣表達自己好。例如明明已經傷心到極點，但仲要夾硬喺親友面前扮無事，咁真係好難受……
5. 刻意冷淡忽略對方
有時候過咗熱戀期，兩個人一但少咗聯絡，甜蜜嘅感覺就好似準備消失。但即使想分手都好，千奇唔好話變就變，用極度冷淡同唔在乎嘅態度對待對方。有咩嘢，都係三口六面認真咁交代清楚啦。
4. 情人節
就算唔係情人節，係其他大時大節都好，喺一片歡樂氣氛下痛失另一半都係件好諷刺嘅事。而且你都唔會咁殘忍，想對方每年過節時都諗起俾你飛咗嘅痛苦回憶啩？
3. 透過第三者提出
感情事連自己都唔肯面對同解決，陣係識揾個人嚟做傳聲筒嘅話，咁真係反映你思想極度幼稚，或者你真係未係咁適合拍拖。
2. 喺公共場所
公共場所又多人又嘈雜，一但有咩爭執拉扯仲可能俾人偷拍放上網，如果係咁真係瘀一世！私事都係私下解決啦……
1. 俾人捉到出軌時
呢個真係最慘最尷尬嘅分手情況，自己發現對方偷食已經傷心欲絕，點知對方唔單止唔認錯氹返自己，竟然仲索性直接提出分手，呢鋪真係小三嬴晒，心碎滿地……
（圖片來源：tumblr、getty）
