大家可能都會定型女人做口是心非嘅動物，但有時女人都可以好直接嘅，正如有啲男人都鍾意將啲嘢講到含糊不清一樣。
即使唔可以一竹篙打一船人，但女人講嘢真係大部份都唔太直接，不過男士們唔好因為覺得女人講咩都口是心非，就索性忽略佢日常間表露嘅感受啊！
所以跟住落嚟就同大家一齊分析吓女人面嗰句同底下真正嘅意思，學吓點樣睇穿女人嘅心啦！
1. 聲稱有男朋友
說話：「我已經有男朋友。」
真正意義：「無論係咪真係有男朋友都好，我只係想你唔好再煩住我。」
點解咁講：因為好多男人對直接嘅拒絕都感到抗拒，甚至乎起晒槓話返女人轉頭。女人為咗避免呢種情況，又等雙方都好啲落台，就會選擇咁講。
你應該：放棄啦，就算佢有男朋友係真定假都好，都與你無關。唔好嘗試「證明對方講大話」，接受佢對你無興趣嘅事實，找尋下一個目標啦。
2. 假電話號碼
說話：「好啊，我就畀我個電話號碼你，就係……（輸入假電話號碼）」
真正意義：「我唔想你揾到我，不過又唔好意思直接咁講。」
點解咁講：女人都有個自我保護機制，當一個男人令女人覺得佢份人好堅持，甚至有啲古怪嘅時候，可能就會選擇畀一個假號碼應酬佢。
你應該：唔好太介懷或者不斷諗點解佢選擇呃你，唔使將呢件事同自己聯繫太多，有時女人係真係要覺得安全或對你有好感先會畀contact你嘅。
P.S. 唔好當場試吓打個號碼睇吓啱唔啱，如果係假嘅咁試嚟都無意義，因為原因係女方想拒絕你；如果係真嘅，咁就會令對方覺得你咁做令佢好唔舒服，咁何必多此一舉呢？
3. FRIENDZONED
說話：「我好開心有你呢個咁好嘅朋友啊！」
真正意義：「我好滿意而家朋友嘅關係，亦唔希望會改變。」
點解咁講：異性朋友嘅相處有時都好難定下介線，成日都聽「朋友以上，戀人未滿」，對方之所以咁講，可能就係想避免你有錯誤嘅幻想。
你應該：放棄同對方嘅關係會超越朋友嘅念頭啦。人生唔係得愛情嘅，如果因為覺得被人拒絕就放棄呢段友誼，咁就會好可惜。你可以選擇繼續呢段友誼，但如果你覺得繼續面對對方會令你痛苦嘅話，你當然亦可以選擇唔再同對方聯絡。
4. 假高潮
說話：「我高潮喇！」
真正意義：「我而家扮緊有高潮。」
點解咁講：有時候女人的確會假扮有高潮，令男人覺得自己真係滿足到眼前嘅伴侶，能夠有一份成就感。
你應該：絕大部份時間你都唔會知道到底對方講呢句係真定假。假設你對佢有懷疑，你應該問吓伴侶鍾意嘅性愛模式係點，會唔會做啲咩會令佢特別享受，咁會鼓勵佢講出自己嘅真實想法。
5. 話自己好忙
說話：「我呢個禮拜好忙啊，遲啲等我忙完再揾你吖（實質上之後唔會再聯絡）」
真正意義：「我無興趣再同你發展落去。」
點解咁講：睇到呢度，發現女人要拒絕男人真係有好多唔同嘅藉口。講呢啲說話，都只係希望盡力將傷害減到最低。
你應該：另覓對象啦，假設佢對你一啲興趣都無。因為就算佢真係好忙都好，如果佢真係因為工作忙，就好似完全唔記得你存在咁，你都應該揾一個願意擠出時間陪你嘅伴侶！
6. 扮無事
說話：「我無嘢。」
真正意義：「我好有嘢，但又唔想做得咁明顯。」
點解咁講：如果女人成日有事扮無事嘅話，其實係對男方唔公平，亦唔成熟嘅行為。但女性通常都會覺得男方應該細心啲，唔講出口都感覺到自己唔開心或者有不滿。
你應該：溫柔咁同對方帶起呢個問題，可以講「我知你唔係真係無嘢，但我唔識讀心術，我亦唔知發生咗咩問題，所以想知道係咪自己做得唔好，定係做錯咗咩。」你咁講完就等如將個波交返畀對方，咁而家就係對方應該坦白自己想法嘅時候喇。
7. 短暫分開冷靜一吓
說話：「不如我哋短暫分開，好好冷靜一吓。」
真正意義：「我對我哋之間嘅關係好有懷疑。」
點解咁講：分手呢個念頭對佢嚟講實在係太可怕，但佢對兩個人嘅關係又有住好嚴重嘅疑慮。所以就想話兩個人分開一吓，好好整理自己嘅情感，思考前路係點。
你應該：你點反應就視乎你有咩感覺，你係咪都覺得繼續呢段關係係一場掙扎，定係完全意想不到對方會咁講呢？最好都係同對方深入咁傾吓到底當中有咩問題，而呢啲問題又可唔可以解決到，因為分開一吓問題都係唔會得到解決。
8. 迴避性愛
說話：「我好攰啊／整痛我啊／抖吓得唔得／今晚唔想。」
真正意義：「我而家唔想同你做愛。」
點解咁講：用咩藉口都好，目的都係唔想同你做愛。
你應該：即刻停止任何動作，即使你覺得對方諗緊咩，或者想休息吓都好，你都應該即刻停低落嚟，然後問對方覺得點，或者需要啲咩。女人口是心非好多時都因為覺得唔舒服或者無安全感，如果男士們係表明自己關心對方嘅諗法，又或者樂意接受批評，咁相信女人會更願意表達自己真正嘅感受。
（圖片來源：tumblr）
