喺現今社會、文化環境下，踏入中年仲扮緊MK仔食煙，番工、喺屋企、去飲等咩場合都只會著住一條運動褲，又或者係用晒佢全部空餘嘅時間打機嘅男人好似一啲都唔罕見。

做一個「大細路」當然唔係咁夠魅力，雖然大部份男人都有大唔透嘅一面，但到底呢種係可愛抑或幼稚就要睇情況同程度喇。就算一個男人有時似小朋友都好，女仔都會睇佢本身係咪一個有承擔、負責任嘅人。就算你幾靚仔、有理想同幽默都好，如果你欠缺成熟，都唔會係一個理想對象。

就睇吓你有無犯以下7項錯誤，無嘅話就恭喜你，你的確係一個「真．男人」。但如果有犯嘅話，就好好注意同改正過嚟喇！

1. 玻璃心

如果男人擁有一顆玻璃心，需要另一半不斷安撫佢脆弱嘅自尊心，咁樣如履薄冰嘅關係就好難維繫落去。所以你要克服你嘅不安全感，同埋唔好不斷想凌駕另一半嚟令你自己好過啲。一個女人心目中理想嘅真男人係大量、慷慨嘅，而且對自己嘅能力充滿自信，同時亦願意接受批評。

2. 無法溝通

認真地開展任何一段關係嘅基礎都係—溝通。雖然呢樣唔會係第一日拍拖就做得好嘅事，但記住唔好吝嗇表達對伴侶嘅讚賞同愛意，但亦唔好講違心嘅大話。坦誠地講出自己嘅諗法，亦要好好聆聽對方嘅需要，咁就係一段同伴侶一齊成長嘅關係。

3. 扮「乜都識先生」

即使你有幾聰明同博學，而另一半都一定有興趣想知道你對唔同事情嘅睇法，但咁樣唔等如係希望你扮到乜都識，見到乜都衝出嚟發表偉論，又或係不斷捉對方錯處同糾正佢。其實講乜都好，最重要都係睇你態度，表現謙虛啲，唔介意俾人哋挑戰或質疑，而且肯承認自己有嘢唔識，咁樣仲得人欣賞啊！

4. 迷戀女仔嘅外表

如果你係一個仲喺青春期嘅男仔，對身穿性感內衣嘅外國模特兒完美嘅魔鬼身材充滿幻想係好正常；如果你係20開頭，特別追求女性娟好嘅外表亦無可厚非。但當人愈大，真正嘅男人就會明白令一個女仔靚嘅唔單只係外表同身材，仲有好多其他特質。即使伴侶嘅身體唔係完美，但一個真實嘅女人畀你嘅感覺絕對比幻想更多。

5. 優柔寡斷

當一個男人分唔清咩嘢重要，就會唔知自己想點，無事業、無目標，亦唔會有穩定嘅關係。女人方面，佢哋只會追求身材火辣，外表夠靚，諗嘢傾向係為滿足自己嘅慾望。但真正嘅男人就好明白佢哋需要一個點嘅伴侶，當遇到時亦會尊重同愛護對方，絕對唔係只為床上之快。

6. 比人哋幫自己決定

真正嘅男人唔會隨波逐流，亦唔會畀人左右自己嘅決定，尤其係喺戀愛上。佢哋對人生哲理有自己嘅睇法，好清楚自己需要啲乜，所以即使其他人唔同意，或者俾人講三講四都好，佢都會捍衛自己嘅選擇，盡力保護另一半，立場唔會搖擺不定。

7. 無好好為未來打算

一個真男人絕對會好好規劃人生，無論喺財政上、工作上，定係最重要嘅同伴侶嘅關係上，都會努力達成自己嘅目標。當佢認定咗一個人，就會希望為對方建立一個穩固嘅基礎。如果永遠只會避免承諾，同埋淨係諗佢哋自己，咁喺佢哋身上真係睇唔到未來。

（圖片來源：tumblr）