頭髮多唔多、髮線會唔會向後移好多時都取決於遺傳因素。可能大部份男人都覺得當頭髮濃密不再，吸引力就會降低，但事實上好多明星都係以禿頭造型示人，尤其係型爆嘅荷里活動作明星！
其實又唔使咁擔心嘅，因為根據美國一個研究發現，禿頭男相比起頭髮濃密嘅男人係被視為更成熟、聰明、誠實同埋教育程度高㗎！
來自美國佛羅里達州貝瑞大學嘅研究學者喺幾年前就做咗個實驗，希望揾出點解禿頭會一直喺基因上延續落去。參與實驗嘅人需要評定一系列男人嘅性格特質，例如係外表嘅吸引力、侵略性、誠信、智力、社交手腕成唔成熟，同埋社會地位等等。
研究結果發現，頭髮濃密嘅男人喺社交手腕嘅成熟程度上得分最低，而得分就隨住男人上升嘅髮線一齊增加，而禿頭嘅男人仲係當中分數最高嘅添！但喺侵略性方面，得分高低嘅趨勢就正正相反。至於喺外表嘅吸引力上，呢樣就同大家預計嘅一樣，髮線愈高，吸引力就愈低。
咁到底點解禿頭嘅基因要一直延續落去呢？進行實驗嘅教授就指頭髮無咁濃密嘅男人望落去感覺無咁大威脅，而且容易接近，所以大家都傾向同佢哋有更多嘅交流同接觸。而稀疏或禿頭嘅人嘅頭髮組織同BB仔係屬於同一類嘅柔毛(vellus hair)，所以感覺上就更加可親。
除咗感覺更加友善之外，一項喺2010年發表，由美國華盛頓大學醫學院科學家做嘅研究顯示，後生時已經留有禿頭嘅男士，比起其他男人患上前列腺癌嘅機會低百分之29至45！實驗揾咗2千個40-47歲嘅男士，當中有一半患有前列腺癌，結果發現頭上帶有禿斑（鬼剃頭）嘅男人患前列腺癌嘅風險係最低嘅。
唔知呢幾項發現會唔會改變某啲每年花費一大筆金錢，希望修復頭髮組織嘅男人嘅睇法呢？如果頭髮真係比較稀疏嘅話，真係不妨試吓一次過剃咗佢，換個新形象！
（圖片來源：tumblr）
