用雪糕早餐作為一日嘅開始，真係好邪惡啊！但怕肥嘅關係，就算幾鍾意食甜品都好，相信都無咩幾多人敢咁做啩？日本發佈咗一個研究結果，睇完之後你會發現每朝名正言順食雪糕不是夢！
東京杏林大學心理生理學專家古賀良彦（Yoshihiko Koga），一直都專注研究紓緩壓力同抗衰老嘅食物。而古賀同日本一間大型烘焙企業合作做咗一個臨床試驗，希望揾出朝早食雪糕對提升腦部表現嘅關係。參與試驗嘅研究對象每朝早起身之後就要即刻食雪糕，然後接受一系列嘅心理測驗。分析完唔同數據之後，發現朝早有食雪糕嘅測試者，佢哋腦入面可以提升警覺性同減少精神刺激嘅高頻率α波段（alpha wave）嘅活動都有提升。
有人可能會拗話只係因為雪糕夠冰凍，所以可以令大腦受到刺激而變得精神，可能飲本凍水效果都一樣嘅姐（仲唔怕肥添）。古賀教授就正正就住呢項質疑再做多一組試驗，發現雖然凍水對大腦活動都有類似嘅效果，但相比起食雪糕，提高腦電波頻率嘅效果就無咁好喇。
雖然古賀教授暫時未有發表朝早食雪糕對提升腦力嘅直接關係，亦唔係建議大家食晒一筒雪糕。參與試驗嘅研究對象每人都只係食咗三匙羹嘅雪糕，所以大家食嘅時候仲要訓練埋自制能力，如果唔係就真係會食出個摺摺肚喇！
（圖片來源：tumblr）
