雪糕人人都鐘意，特別係喺天氣炎熱嘅時候就最應該食雪糕嚟消下暑，夏天唔食過真係對唔住自己。但除左軟雪糕，超市買到嘅雪糕之外，你地又知唔知道香港以外其他國家其實係有佢地獨特嘅「雪糕文化」，而唔同地方雪糕嘅食法都係唔一樣嘅呢？不如我地就一齊嚟睇下以下9個國家嘅11款必食雪糕啦！
1. 日本－雪糕麻糬
其實就好似我地嘅雪糕糯米糍一樣，都係用糯米包起唔同口味嘅一口雪糕。
2. 馬來西亞－娘惹紅豆冰
娘惹紅豆冰係當地最出名嘅一款冰品，就好似台灣嘅綿綿冰一樣超級受歡迎。由於娘惹紅豆冰會淋上唔同顏色嘅糖漿，上面又有煉奶、粟米粒、啫喱、水果、蘆薈等嘅配料，所以睇上去色彩都額外斑斕架！
3. 意大利－Tartufo
Tartufo個名一睇就知道係由「松露」演化而嚟，而呢雪糕一球通常都係有兩種或者以上嘅口味，雪糕心主要味道則係水果糖漿或者急凍水果，並由可可粉或者朱古力包裹。
4. 意大利－Gelato
一講起意大利，除左意大利粉同pizza之外，Gelato就一定都係名列前茅嘅意國美食。
5. 阿根廷－Helado
如果你係好鐘意食意大利嘅Gelato，咁阿根廷嘅Helado你就一定唔可以錯過，因為阿根廷嘅Helado忌廉嘅份量會更加之重，味道亦都非常多元化。
6. 英國－凝脂忌廉雪糕
採用左蒸汽加熱全脂忌廉，之後再等忌廉自然冷卻製成，英國嘅凝脂忌廉雪糕就因為佢非常細滑嘅口感而聞名。
7. 土耳其－Dondurma
講起唔同國家嘅特色雪糕，又點可以少得經常都會見到，手工同表演都一流嘅土耳其 Dondurma呢？由於土耳其Dondurma黏性極強，因此售賣呢中雪糕嘅師傅通常都係雜技高手，令你有得食又有得玩。至於味道方面，Dondurma嘅忌廉味都係比較重，而質感則較平常嘅雪糕厚重。
8. 印度－Kulfi
印度人嘅Kulfi雪糕因為係以煉奶等材料製作而成，所以食落其實幾似凍左嘅吉士醬，而除左原味以外，開心果、荳蔻、番紅花、芒果都係常見口味。
9. 德國－麵條雪糕
呢味德國出產嘅特色甜點，睇上去真係好似一盤麵條一樣，但原來卻係將雲呢拿雪糕擠壓成麵條狀，之後再淋上唔同嘅糖漿例如士多啤梨同朱古力等。
10. 以色列－酥糖雪糕
喜歡雪糕但又想試下與別不同嘅質感，或者你就可以試下以色列嘅酥糖雪糕。利用研磨芝麻製成並採用蜂蜜調味，酥糖雪糕係以色列當地一款最受歡迎嘅夏日甜點。
11. 阿拉斯加－Akutaq
「Akutaq」嘅意思即係將某啲東西攪拌埋一齊，而對於阿拉斯加人黎講，呢款名為Akutaq嘅雪糕傳統上就係會將動物脂肪混合香甜嘅野莓等製作而成。更甚嘅係除左野莓之外，部分人更加會喺Akutaq加入鮮魚等大家諗都諗唔到嘅食材入去。
