【好無癮】Gap Outlet童裝忽然加價

話說早前媽媽我偶然發現九展的Gap Outlet有好多Baby衫、鞋仔等，又平又靚，開心Share畀各位讀者。

然而好景不常，事隔唔夠一星期，今日再到現場已發現全部Baby衫已轉款，相信之前嘅靚貨已經被搶購一空！正在暗中盤算「仲好啦！有新貨買仲好！」之際，冷不防看到價錢牌有異於當日！

細看下發現全場男女裝貨品依舊全場2折，但嬰童貨品就加咗價，全部2.5折！

喂呀！上次係全場服裝2折、配件類1.5折架嘛！

媽媽保持冷靜下繼續Shopping，同時不斷自我催眠：「唔緊要！貴少少啫，2.5折都仲係好抵呀！」但好可惜，愈睇愈唔對路，新返貨嘅款式真係太不堪入目！有幾核突？自己睇啦！

呢件原價$129，2.5折即係$32.3。嗯，同喺街邊檔買嘅有咩分別？

呢件長袖夾衣原價$229，2.5折即係$57.3。但同上次媽媽我買果款夾衣真係差得遠呀！

呢件LOVE細看之下可以發現佢係主打ANNA & ELSA，切合女童最愛嘅公主熱潮！但係...

咁污糟嘅喂？我明！啲衫款靚唔靚、好唔好睇真係見仁見智，但都唔好有污積丫！叫人情何以堪呀！

呢頂Lace帽都ok嘅其實，但係上次全部配件類係1.5折，今次就全部嬰童貨品2.5折，即係貴咗囉！

呢件算係全個Outlet嘅童裝入面，媽媽朋友認為最正常嘅一件，無錯！係正常，並未到靚嘅程度！多謝！

核突家居布鞋，$10一對。恕我孤陋寡聞，GAP有賣開呢啲嘢嘅咩？

最後結論係，現場嬰童裝款式及質素大不如前(其實上次去都係一星期前)，幾個媽媽朋友都齊聲說：「比出口店更差！」如果想掃靚童裝嘅媽媽，未去嘅真係可以唔使去，最少呢排可以唔使去！