仲記唔記得小朋友嘅時候，番學最期待嘅係乜野時間呢？仲駛問？當然就係小息啦！睇住小賣部琳琅滿目嘅各樣零食，但自己手上面就只係得有限嘅零用錢，自然就一定要同同學夾計，各自買一款之後分甘同味。諗番起，又真係好似好淒涼咁！
唔知到大家宜家大個左之後，仲有冇掛住以前最鐘意嗰幾款零食呢？今日小編就準備左10大您必定食過嘅經典零食，等大家可以回味一番！
1. BB糖
BB糖嘅形狀就好似肚臍餅一樣，圓形厚厚地中間有個窿咁好容易就認得到。只要將BB糖放入口裡面，將糖嘅小孔面向外面大力一吹或者吸，就算你唔識得吹口哨都變成左識吹口哨呀！真係超級好玩！
（售賣點：祥華食品公司-觀塘觀塘道396號地下C）
2. 爆炸糖
爆炸糖對於小朋友黎講，簡直就好似挑戰勇者塔咁，事關每逢將堆好細粒嘅糖掉入口裡面嗰時，口入面啲糖就會霹靂啪啦咁彈到你個口超痛，合埋口人地都聽到你啲糖喺口入面爆炸緊！雖然爆炸糖到宜家都好容易買到，但小編硬係覺得佢同以前相比，威力好似減弱左咁，唔知大家有冇同感呢？
（售賣點：各大超級市場）
3. 沙爹魚串
每逢去到士多、辦館，都一定會見到有個透明有字嘅膠袋載住佢地，而您亦會因為仍睇落好好味同好大串而超想買翻條。講真到宜家無乜小店仍然開業之下，要搵番沙爹魚串真係幾難架！對比起以前經過士多一定見到？咁嘅情況已經唔會再出現喇！
（售賣點：豐昌辦館-沙田瀝源街6號瀝源邨華豐樓平台）
4. 奇多
奇多受歡迎嘅原因並唔係因為佢好食，而係因為佢當中所附送嘅玩具係超級簡單得嚟又非常豪華。而喺佢附送嘅玩具當中，以世界各國特色景點作為主題嘅奇多圈就最受小朋友歡迎，好靚又好好玩。除咗可以用嚟同朋友激戰之外，奇多圈亦都可以好似閃卡咁用嚟同人交換，完全係增進友誼嘅一種玩意嚟架！
（售賣點：各大超級市場）
5. 牛仔片
學校小賣部必有零食，而且價錢仲要係幾乎每個人都負擔得起，真係可以話係最受歡迎嘅薯片之一！一格格一塊嘅牛仔片，食完好似食左陣風咁，到宜家喺超市都輕易搵得到。得閒經過超市就買番包回味下啦！
（售賣點：各大超級市場）
6. 媽咪麵
媽咪麵喺小時候，屬於價錢中等嘅一樣零食，比牛仔片貴少少，但又未至於係最貴嘅一樣零食。但如果同阿媽講話想食媽咪麵，唔知係唔係「一山不能藏二媽」，佢地個反應一定係唔會肯買。點解？咪就係因為佢個包味粉（味精）囉！
（售賣點：各大超級市場）
7. 魚仔餅
延伸剛剛講到嘅價格問題，小編以前讀嗰間學校，價位最高嘅就正正係強大嘅魚仔餅。相比起其他小食，魚仔餅並唔係每一個同學都會捨得買，而亦唔知點解當您有錢買嘅時候，小賣部竟然就會好衰咁放燒烤味出嚟而並非最受歡迎嘅紫菜味。所以真係除左錢之外，仲要有少少運氣先至得架！
（售賣點：各大超級市場）
8. 眼鏡朱古力
如果要評價零食嘅造型，眼鏡朱古力當然一定會榜上有名啦！又食得又玩得，仲要係七彩顏色非常醒目！雖然眼鏡朱古力睇落係幾得意，但其實味道卻係非常一般。果然外型係最能夠呃到小朋友去買，味道始終係其次呢...…！
（售賣點：豐昌辦館-沙田瀝源街6號瀝源邨華豐樓平台）
9. 樽仔糖
樽仔糖最深入民心嘅口味，當然就係可樂味啦！撇除佢可樂嘅味道，細細個可樂罐嘅造型就已經非常吸引，而除左可樂口味之外，大家仲記唔記得佢係有提子味道嘅呢？兩個都係非常好食架！
（售賣點：財記士多-石硤尾南山商場86號鋪）
10. 超巨型波板糖
問心嗰句，波板糖其實一啲都唔好食，但對於小朋友嚟講卻又係非常吸引嘅一種糖果。而且更甚嘅係一個唔小心將波板糖跌左落地，佢地就會同小朋友個心一齊碎開，真係好慘架.......！
（售賣點：豐昌辦館-沙田瀝源街6號瀝源邨華豐樓平台）
