超級工程：羅馬是怎樣建成的IV暴君的鐵腕(5) 之被詛咒的家族/上（Zannanza）

尼祿NERO (公元37-68年)

公元1世紀最令人恐懼既兩大羅馬暴君，可能亦都係整個羅馬史上最恐怖既兩位暴君，相信冇乜人會反對就係卡利古拉(Caligula)同尼祿(Nero)。然而，好多人未必知道，兩人的命運，原來從好早既時候就已經交纏不清。當我地要深入探究尼祿既建築，我地就先要從佢既幼年成長開始，了解呢位一代魔君到底係如何煉成。

背景介紹：被詛咒的家族/上

要了解尼祿(Nero)既背景，首先，我地不得不從卡利古拉(Caligula)既沒落講起。承上回，我提到卡利古拉有三個細妹：阿格里皮娜(Agrippina)、杜魯斯娜(Drusilla)、莉維尼娜(Livilla)。當中杜魯斯娜(Drusilla)英年早逝，難以承受喪妹之痛既卡利古拉陷入歇斯底理既瘋狂之中。後來卡利古拉因為揭穿左一場政變陰謀，而流放左自己兩個細妹阿格里皮娜(Agrippina)同莉維尼娜(Livilla)；當卡利古拉死後，兩人得以重返羅馬。卡利古拉既細妹阿格里皮娜(Agrippina)，正正就係另一位大暴君尼祿既生母。

有其母必有其子，我地對尼祿既深入剖析，就從佢老母阿格里皮娜(Agrippina the younger)開始。

尼祿之母，卡利古拉之妹——朱莉婭．阿格里皮娜

蛇蝎心腸
俗語有云近朱者赤，近墨者黑，一個人既成長環境同身邊遭遇既事物，好影響佢既性格同價值觀既塑造。卡利古拉既妹阿格里皮娜(Agrippina)係個點樣既人，我地從佢身邊既人大約可以估到。據史學家所載，阿格里皮娜係一個非常淫蕩既女人，亦都好識得用虛情假意既溫柔、甜言蜜語、同美貌引人落搭；呢個人手段相當毒辣，對付對自己有威脅既人不擇手段，甚至可以話係毫無底線。但係響呢d野之上，阿格里皮娜亦都係一個極大野心既女人，佢既政治野心甚至超乎左所有人所想。當返到羅馬之後，阿格里皮娜精心策劃，準備一步步咁實現佢既計劃。

左一為阿格里皮娜頭像，另外兩個係佢既細妹

公元28年，年僅13歲既阿格里皮娜就響當時皇帝提比略安排之下同佢第一任丈夫，43歲既圖密捷烏斯．阿赫諾巴爾布(Domitius Ahenobarbus)結婚，一個典型既盲婚啞嫁加老夫少妻家庭。9年後既公元37年，佢地既第一個BB出世，呢個人就係後來既尼祿(Nero, 雖然亦都有傳言係圖密捷烏斯．阿赫諾巴爾布戴左綠帽，尼祿唔係佢親生)。蘇埃托尼烏斯(Suetonius)所著《十二帝王傳》(The Twelve Caesars)中記載，當阿格里皮娜同佢第一任丈夫圖密捷烏斯接受朋友祝賀時，圖密捷烏斯曾經講過一句話：「我認為我自己同阿格里皮娜結合所生既任何野，將來都唔可能國家同人民帶來褔祉。」

圖密捷烏斯既戲言would prove to be prophetic.

僅僅3年之後，小阿格里皮娜既老公就病逝，有人話佢本身命犯剋夫，姑勿論呢d迷信野，根據歷史學家記載，圖密捷烏斯有可能係小阿格里皮娜多個老公同情夫當中唯一一個自然死亡，不過唔係因為咩命水運氣既問題，而係小阿格里皮娜呢個人相當有嫌疑。

佢接近過既咁多男人當中，除左第一任老公之外，幾乎全部都係冇利用價值之後，被阿格里皮娜設計殺害或者暗殺。41年，卡利古拉被刺殺，阿格里皮娜返到羅馬城，克勞狄被皇家親衛隊推舉上任。響羅馬人民慶祝暴君統治結束既歡呼聲中，小阿格里皮娜一邊謀劃佢既奪權之路，一邊實行佢既全盤陰謀。

權慾帝都
同民主既古代雅典唔同，羅馬既權力中心從來都係一個弱肉強食，腥風血雨的競技場。稍有不慎，權力既高峰亦都會成為爭權者既墓塚。阿格里皮娜好清楚權慾帝都既遊戲規則，因為佢就係響咁既腥風血雨底下長大：同親生哥哥卡利古拉上床，然後被佢流放到荒島，目睹發生響羅馬既一切人性醜惡等等，阿格里皮娜既心理難免扭曲。佢返到羅馬之後，好快就發現當時羅馬一個好有影響力既社會名流帕西安努斯(Passienus)可以成為佢既踏腳石，於是就同佢搭上左。佢成功說服叔叔，即皇帝克勞狄(Caludius)，命令帕西安努斯同佢元配離婚，並娶阿格里皮娜為妻。呢個時候，克勞狄既皇后(第三任妻子)係臭名昭著既蕩婦梅莎麗娜(Messalina)，梅莎麗娜風光既時候，以子虛烏有既通姦罪流放左卡利古拉另一位妹妹：莉維尼娜(Livilla)。為左剷除一切潛在敵人，梅莎麗娜說服克勞狄響冇審訊既情況下派人殺死左莉維尼娜。

為自保，阿格里皮娜保持低調，好快佢落毒暗殺第二任老公，帕西安努斯(Passienus)就係咁成為左犧牲品，而阿格里皮娜就順理成章咁繼承左帕西安努斯既巨額遺產。事實上，佢一開始接近帕西安努斯既目的已經昭然若揭，就係為左謀佢副身家。公元48年，佢終於等到佢期待已久既機會。梅莎麗娜因為密謀同佢既情夫，元老西利烏斯推翻佢丈夫克勞狄被處死，而阿格里皮娜就以一貫既手段引誘並勾搭上叔叔克勞狄，響公元49年成為左佢第四任老婆。

梅莎麗娜(Messalina)，以及她為克勞狄(Claudius)所生的皇子不列顛尼烏斯(Britannicus, 記念克勞狄征服不列顛尼亞)雕像

清除異己
響成功勾引克勞狄之前，阿格里皮娜已經有計劃地剷除卡利古拉遺孀保羅連娜。為左確保兒子尼祿(Nero)能夠娶到克勞狄既公主奧緹維亞(Octivia)，以鞏固佢將來繼位既機會，阿格里皮娜捏造子虛烏有罪名放逐奧緹維亞原本既訂婚對象希拉努斯(Silanus)，結果希拉努斯響阿格里皮娜同克勞狄成婚之日被逼自殺。阿格里皮娜成為皇后之後，面對而洶湧群情既反對壓力，凶殘既本性變本加厲。佢肅清皇宮內一切前任皇后梅莎麗娜既殘餘勢力，清除一切可能對佢兒子尼祿登位造成干擾既絆腳石。阿格里皮娜利用自身本錢令克勞狄欲罷不能，後者被迷得神魂顛倒，更將一個邊境殖民城市以佢既名字命名為Colonia Agrippina，亦即係今日德國科隆(English: Cologne, Deutsch: Köln)。終於響公元50年，佢達到左重要既里程碑：克勞狄正式收尼祿為義子，仍然年少既尼祿終於響佢母親既悉心安排下進入登基既大直路。

為左進一步確保尼祿將來能登大位，阿格里皮娜千方百計將克勞狄既親生皇子不列顛尼烏斯邊緣化，又殺死左同佢頂撞既，不列顛尼烏斯既教師。佢將被梅莎麗娜捏造罪名流放既塞內卡召回，安排佢成為尼祿既帝師。到左公元53年，16歲既尼祿同克勞狄既公主奧緹維亞結婚。不過好快克勞狄就聞到唔對路，可能佢已經發覺阿格里皮娜野心太大，同埋佢背後既重大陰謀，於是佢重新追捧親生仔不列顛尼烏斯，企圖重新奪回尼祿既繼承權。

克勞狄(Claudius)係皇帝，佢要咁做，理應冇人阻到佢。但係阿格里皮娜係唔會咁容易認輸，佢不論任何手段都唔會比呢件事發生，令佢多年既部署付諸東流。於是佢策劃左一場最大膽既暗殺：
弒君

一不做二不休，佢決定先下手為強，暗殺第三任老公，亦都係時任羅馬皇帝既克勞狄(就係第三季最尾果個)。

克勞狄之死
公元54年10月13日，克勞狄如常響宮中飲宴，話說克勞狄好鐘意飲酒，成日都飲到自己醉醺醺。阿格里皮娜知道呢個就係下手既絕佳機會，於是僕人端出佢預備好既，一碟落左毒既磨菇。克勞狄響醉意濃濃中食左下酒小菜，之後……嗯，之後就冇再醒過黎。事實上，阿格里皮娜三段婚姻之中，有兩個老公都係比佢毒殺；用蛇蝎心腸形容，最適切不過。

克勞狄被剷除之後，已經冇野可以阻止尼祿奪得皇位。好快尼祿順利登位，或者當時既尼祿根本唔知道做皇帝係咩一回事，或者佢心裡面根本唔想做皇帝。但係年輕既尼祿就咁成為左母親阿格里皮娜既扯線公仔，而阿格里皮娜順理成章成為太后，垂簾聽政，掌握住羅馬帝國：當時世上最強大帝國既真正實權。身不由己，淪為傀儡既尼祿，響佢母親同身邊所發生事件既耳濡目染之下，形成左扭曲既性格。尼祿既興趣向來都唔係做皇帝，所以佢亦都唔曉得做皇帝隨權力而來既責任，佢只係鐘意隨心所欲既生活；佢只係被佢呀媽推上帝位，作為對方掌控大權既工具，而佢就利用得來不易既權力取悅自己。或者係因為呢個原因，亦都種下左將來成為千古罵名一代暴君的禍根。

作者：Zannanza（本文章由聚言時報授權提供）