GoGoVan誓爆剷app潮（黃一恒）

GoGoVan一定會爆剷App潮，今次唔係要多謝Shell，而係要多謝幕前推手民建聯！

話說天下之勢，關公一日都嫌長。我早上仍半夢半醒，在床上把弄Facebook之際，已見到有網友Share一張藍色海報，海報右方是一架貨Van內裡坐了GogoVan啟辦人，而左方有大大個民建聯Logo，未睇內容，第一印象是GogoVan何時做了禮義廉的代言人？細看之下才知海報宣傳某個民建聯有份舉辦的創業講座，除了GogoVan創辦人，還有多名主講嘉賓，只不過突出GogoVan做Selling Point。我自己本行都係平面設計，咁嘅宣傳手法本身冇乜唔妥，邊個賣點最吸引就盡量突出它，反正觀眾永遠無時間仔細睇內容，最緊要有一個First Impression。

衰就衰在，當GogoVan呢個First Impression跟萬惡民建聯連結埋一齊，立即好事變柒事，其爆炸威力，非同小可。那時我從Facebook要感受到網友們的怒氣，但慣於早上瞓覺的我，當時實在太過眼瞓，未有精神追Post，瞓番着。

及至中午又醒一醒，繼續半睡狀態下睇Facebook，看到GogoVan個Page新發表篇題為【關公有話兒】嘅Post，當堂醒一醒！個Post唔長，主要表明GogoVan自己係「政治中立」，表示事前不知論壇有政當參與，並決定不出席論壇云云。但識睇一定睇留言，網友們絕不因為這篇關公聲明而收貨，大家繼續留言怒插，多人表明已經剷走了GogoVan個App，轉投Call4Van云云。

其實，作為GogoVan長期用家的我，今早看到GogoVan創辦人要出席民建聯論壇，本身冇乜大感覺。香港每日都有幾十萬個這種論壇，而每個論壇又總會有幾十個合辦或聯辦機構合力宣傳，總會多多少少有些機構來自政府或涉及某些政治組織。作為受邀嘉賓，要麼完全不出席論壇，要是想完全「政治中立」，把自己抽離於政治之外，其實係避無可避。

但當我看到GogoVan篇【關公有話兒】，實在令人生厭。首先，咁大間公司應邀出席論壇，無理由無問清楚主辦者係邊個。知道誰主辦，仍決定出席，那麼大大方方出席便是了！聽到網上有劣評，然後自己心怯，臨時改變主意，決定不出席論壇，本身就係言而無信，有負於論壇主辦機構之舉。胡亂寫篇乜鬼「關公」聲明，實際上為自己製造公關災難。

今時今日香港，太多人迷信乜嘢「關公」，以為識寫兩隻字，懂得度兩條屎橋，就懂得玩弄「關公」。「公關」全名就係公共關係，而政治就最能夠在日常生活中影響人與人之間的關係。好多人毫無政治觸角，卻亂請「關公」，出左事就拿「政治中立」做擋箭牌，實在貽笑大方。「政治中立」這四字成語被人誤用得太多，有時真係難聽過粗口！

看完GogoVan篇垃圾【關公有話兒】，令我下定決心安裝Call4Van。我之前曾經詢問過身邊朋友，到底Call4Van是否真的可以叫到貨Van。因為我時常見人在Facebook分享Call4Van的時評金句，我一路以為它的正職係做時事評論。及至今日，身邊朋友以及網上好多人都一致推介Call4Van，我才如夢中初醒！首先，香港用家唔係白痴，不會為撐而撐，如果Call4Van叫唔到車，冇人會去用。所以我第一個擔憂根本唔存在。

第二，我諗番起Call4Van個Page以前的Post，都係即時回應大家關心的事，令人感到言論出自肺腑，有果句講句，唔係為左公關而請關公。

講到尾，乜鬼公關都係假，人同人相處，貴乎兩個字：真誠！

作者：黃一恒（本文章由聚言時報授權提供）