叫我689事件的投名狀

689先生經常鬧出事件，我做呢行聽埋唔少啦，呢件機場事件上個月已經聽過，不過又會今日先被爆出嚟，真係好怪。我上個月聽到版本可能同報紙有啲出入，今朝我同航空界朋友既Whatsapp group都爆晒消息，綜合返啲資料先：

件事上個月凌晨發生，689一家不嬲橫行霸道，整個航空界都知，唔知大家可以問返航空界朋友，幾年前689去馬爾代夫搞果單大壇嘢，係度唔詳細講。

689一家去親機場都有人跟出跟入同服待，成家慣左唔推行李車，有人係後面跟尾。相信網友搭過飛機都知，點會成個行李車漏左係禁區出面丫，仲要架機臨起飛先知，擺明平時做慣大小姐俾人服待慣。

細女發現職員無拎到行李，當然叫職員拎返啦。職員唔肯，細女搵阿媽嚟嘈，阿媽對住成個機場職員「拆蟹」，機場職員我係指保安公司丫、機場人員，成堆啦。

呢班職員唔係唔想「特事特辦」，而係幫人拎嘢入禁區係有100個危機。第一，如果袋入面有咩違禁品，隨時自己坐十年八年；第二，如果俾對家(即降落地點國家)知道某乘客行李唔係自己拎入去禁區，隨時拉人封艇有排搞。

嘈左一輪之後，就發生「叫我689事件」，報紙賣晒我唔詳細講啦。翌日朝早某A字頭保安執行督屎訓醒知道發生咁既事，即刻向689先生立「投名狀」，即刻KO 涉事職員。

究竟呢單嘢係咪涉事職員爆出嚟呢?我估99% 都係，但係邊個涉事職員呢？我就真係唔知，因為某A字頭保安執行督屎立左投名狀後，其他公司高層都疑似跟風立左投名狀。

據我收到既消息，某A字頭保安執行督屎立既投名狀唔係叫你即走賠錢俾你，係俾一個月通知期，(真係羞家 - - 立投名狀都立得衰過人) 岩岩涉事職員正式夠鐘，咪向傳媒爆大獲。