超級工程：羅馬是怎樣建成的II希律王之野望(5)（Zannanza）

文化

2016-02-16 |

2187

耶路撒冷聖殿山及聖殿擴建（公元前20年-公元63年）

山在何處？

聖殿，係猶太教最重要既宗教建築，作獻祭活動既唯一指定場所。希律王呢個咁大野心既人，又點會放過響呢幢咁偉大既建築留低自己記號既機會？於是響公元前20年，希律王開始左佢任內最重大既project：聖殿山（Temple Mount）既擴建。

咪住，聖殿山？有去過耶路撒冷旅行既人應該知道，聖殿所在位置（而家既磐石清真寺，金頂果座Dome of the Rock附近）係平架喎，說好的山呢？唔通聖殿山冇山，正如鑽石山冇鑽石、龜苓膏冇龜一樣？Where’s the ‘Mount’ in the ‘Temple Mount’？

咁當然唔係喇，聖殿山果度其實真係有座山架，猶太人既聖殿同而家既磐石清真寺都係起響座山上面。咁如果你真係要問座山去左邊，咁呀……你就要去問下希律王喇！

今日的聖殿山，上面的金頂建築物係阿拉伯人征服耶路撒冷後落成既磐石清真寺（Dome of the Rock），落成於公元691年。覆蓋整座聖殿山既平臺（platform）仍然清晰可見，同側邊的民房比較下就知道有幾大。

希律聖殿山同另一組羅馬超級建築，黎巴嫩太陽城（Heliopolis）神殿群建築藍圖重疊，可見兩者面積對比

重修聖殿

話說當希律王在位時，聖殿山上已經有座聖殿響度叫第二聖殿，係波斯王居魯士大帝（Cyrus the Great，前576-前530年）打敗巴比倫之後允許猶太人返鄉下既時候起既。正因為咁既原因，起初班祭司都好抗拒希律王既計劃，因為驚施工期間會令到獻祭停止，呢個真係猶太教入面不能接受既大忌。咁希律王就應承左班祭司，話工程期間business as usual，甚至預早響開工前已經預備好所有建築材料放響工地。單單係聖殿山整個結構所用既石材，就有大約100萬噸之多，開採所需時間達8年之久，可謂費盡苦心。為釋除疑慮，希律又比班祭司全權負責聖殿本身既翻修，咁佢地終於先傾掂數。

聖殿山平臺建築藍圖

聖殿主體建築（Temple proper）平面藍圖

奠基巨岩

響設計同建造既過程中，希律王同樣聘用左好多希臘、羅馬、埃及既建築師，而且洗錢大手筆，以爭取猶太人對佢既支持。希律王既計劃野心好大，佢要將成座山填平成一個長500米、闊300米既長方形，建成後呢個長方形既人工平臺會完全將整座聖殿山覆蓋；平臺面積面積150,000平方米，足夠容納25個標準足球場。由於平臺既下方地形非常複雜，覆蓋山丘同峽谷，而頂部要維持平整，所以平臺離地最高點有成35-40米，相當於需要10層樓高既人工護土牆！為左防止山體滑坡，希律王既建築師先下令挖掘地基安裝巨石，然後再響上面修建呢圈護土牆。希律聖殿山最大既房角石長13.6米、闊5米、高3.35米，重量達到驚人既600公噸（metric tons）。除左呢塊之外，護土牆用左唔少100噸以上既奠基石；即使用現代起重機，要安裝600噸既巨石都唔係一件易事。更令人驚訝既係，聖殿山既石材緊密連合，石同石之間連一張紙都插唔入，可見建築技術既高超。甚至直到今時今日，當地人仍然驚訝於石材既大小，講笑話係天使將佢地堆砌起來咁話。

希律聖殿山護土牆既立體藍圖：周長1,600米，最高處相當於十層樓高

聖殿山最重的奠基石，重達600-650噸

從地面到平臺面又點算呢？希律王可以使用填土既方法：先起巨型既護土牆（retaining wall）圍住，然後填入夯土。但係建築師計過數，咁樣做會導致過重，因為填入既泥會有外向力，對護土牆構成好大既壓力。於是建築師採用多層拱廊（arched colonnade）既方法，既減輕重量，又可以承受平臺上建築物既重量。

護土牆內多重重疊拱廊示意圖，取代填土方法平整聖殿山頂部，減輕山體重量同時可加強承重效果

柱廊

平整完成之後，係時候要響上面起野。聖殿山其實主要係由兩部分組成：人人都可以入既外邦人院，同場只准猶太人入既聖殿區。而聖殿區又由外到內分成女人院、以色列院，同聖殿建築本身（得祭司可以入去）。非猶太人係絕對唔入得聖殿區，響聖殿區既各門口前都設有希臘語同拉丁語既警告牌：「外邦人嚴禁通行，違者處死」。希律王響平臺既南邊興建一座巨大既皇家柱廊，呢幢皇家柱廊長200-240米，闊33米，內部列設4行大理石柱（40根1.5米直徑、10米以上高度既立柱），石柱採用古希臘科林斯柱式，柱列之間係三個闊度9-13.5米闊既大長廊。當中左右兩廊高度15米，中央廊高度甚至可能達到30米。

希臘文的警告牌，立於聖殿區入口。內容：外邦人嚴禁通行，違令者死

呢幢巨大既皇家柱廊係用黎做買賣同兌換既地方，因為猶太人獻祭既規矩對銀幣同祭物都有嚴格既限制，羅馬既硬幣上面有人頭已經犯規，所以就要黎呢度兌官方允許用既銀幣買祭物。咁全羅馬各地既猶太人都要黎過節（約瑟夫記載根據當時統計，一個逾越節已有二百七十萬人次入耶路撒冷過節），咁就催生出一門好大既生意。咁有生意既地方都有不誠實既商人，從中牟利者絕不在少數。所以耶穌就發起左佔領聖殿既行動，去踢爆班商人既檔，鬧佢地搞到原來應該神聖莊嚴既地方如同市井，滿地銅臭。咁阻人發達就等於殺人父母，再加上佢又同班既得利益者爭辯；佢響度做正義既事，對方眼中就係踩場，所以其實暗中得罪左好多人，亦都有好多人想買起佢條命。另外值得一提，佢入聖殿時係個施工中既宏偉工地，而當時工程已經進行左46年。

聖殿山南面皇家柱廊復完圖，作為進行買賣同兌換的場所使用

聖殿

返到去聖殿本身，本來既聖殿落成左已經500年，所以希律決定起過座新既、更偉大既聖殿。佢將聖殿內部加高20肘（大約10米）至27.4米。聖殿內部平面圖同舊既一樣，聖所20米x10米，至聖所10米x10米，中間用幔子分隔。至於建築物外觀就好大分別，根據約瑟夫所述，整幢建築物總高46米（從加高既地臺起計27.4米，與之相比，羅馬鬥獸場48米高），門面闊46米、後方闊約30米成T字型。外牆係用最優質既雲石鋪砌，樓頂上設有金造既針防止雀鳥停留；響東地中海猛烈既陽光底下，遠望就似雪山一樣，刺目既反射令人不能直視。殿前既祭壇就加到23米長。

希律聖殿復完圖

內部結構剖面圖

終局

希律王開始左聖殿山既龐大計劃，但佢就睇唔到呢幢猶大國史上最偉大工程既落成。佢聘用左1-1.8萬名工人建造巨大既平臺同柱廊，1000名祭司負責聖殿內部既建造工程（因為請返黎既工人唔可以碰聖殿本身，就連普通猶太人都唔入得）。聖殿既初期翻修用左18個月就完成，但整個建築群既施工由公元前20/19年一直進行到公元63年左右，總共歷時83年先至完工。但到公元70年，聖殿就被攻入耶路撒冷城既羅馬軍隊燒毀。起初約瑟夫（Josephus）苦苦哀求羅馬軍總帥提圖斯（Titus）唔好破壞呢幢咁偉大、咁靚既建築物，而提圖斯都應承左，但到最後關頭有個羅馬兵因為打到火冒三丈，就扔左個火把入聖殿。聖殿雖然石砌，但裡面用左好多黎巴嫩既香柏木（cedar wood）木材，所以個火就一發不可收拾。呢幢偉大既建築落成左短短7年，就咁樣響戰爭既烈火中付諸一炬。97000猶太人為賣為奴，聖殿入面既聖物包括純金既七燭台（Menorah，Hebrew: מְנוֹרָה‎）被帶到羅馬既凱旋式，呢幕至今仍銘刻響提圖斯所建既凱旋門（Arch of Titus）上面。失去第二聖殿後，耶路撒冷既哭牆，亦即係聖殿山基座既西牆（Western Wall，護土牆），就成為左猶太人精神上既慰藉。