吳亮星好波!

港豬甲:「吳亮星好波!」

港豬乙:「吳亮星有咩咁好波先?」

港豬甲:「銅鑼灣書店有五個人失左蹤,果班泛民就大造文章,話係咩政治綁架,講到似層層咁;咁好喇,而家輪到吳亮星話係果五條書局友,靜靜雞偷渡返去祖國嫖妓,跟住又俾公安捉到應一應,咁同樣都係靠估架啫,又俾人強烈批評。」

港豬乙:「咪係囉,泛民估件事同大陸綁架有關,咁吳亮星都係估下同嫖妓有關,兩邊都係傳聞喎,點解只得佢地批評人,人地唔可以批評佢地先?咁即係雙重標準架啫!」

筆者忍不住插口:「斷估都要有啲根據,唔係任由你亂作去侮辱人地人格,身為立法局議員,亂咁講野俾人插是常識吧。」

港豬甲:「咁你又憑咩咁肯定佢地五條友仔唔係北上嫖妓先?」

筆者:「先唔講佢地係唔係北上尋歡,嗱,老老實實,香港人北上去嫖妓,有邊一個人要偷渡返大陸先?」

港豬乙一臉神氣:「回鄉証俾屋企個老婆keep到實,唔偷渡返去點嫖先?」

港豬甲:「我都係咁諗,英雄所見略同啦。」

筆者:「好!咁我又想請問下兩位英雄,就當佢地五個人真係精蟲上腦,就算明知道係違法都要偷渡返大陸去召妓,不過你地唔好唔記得,佢地最先一個失蹤既人叫桂民海,係上年十月十五日就唔見左,跟住其他職員就陸陸續續失蹤,到最後十二月三十日連李波都唔見埋,佢老婆報警先揭發件事出黎,我想問問你地既良心,如果你係李波,賣得中共禁書既人,近兩三個月發覺班同事忽然失蹤左咁多人,咁你仲有冇性趣仍然要去偷渡返大陸召妓先?」

港豬甲:「或者……我話或者李波唔知道啲同事唔見左呢?」

港豬乙:「係呀,咁都有可能架嘛!」

筆者:「噢!原本你地認為銅鑼灣書店係跨國企業黎既?員工冇一千都有五百人?咁唔見左幾丁友,有人唔知又真係唔出奇;咁好啦,就算呢間書店真係有好多職員,咁你地又知唔知,唔見左果五個人究竟係咩職位身份先?佢地有三個係公司股東,其他既就係總經理,業務經理同店長,咁身為股東之一既李波,又點可能會唔知情先?」

港豬甲、乙沒有反駁,一直沉默……

筆者補充:「其實香港地有既係言論自由,唔係唔俾你地去估,不過亂咁作啲野出黎去詆毀人,侮辱人地人格,我就覺得好冇品囉!」

港豬甲:「照咁講法呢個吳亮星真係好賤格,亂咁作野屈人地去左叫雞!」

港豬乙:「我都覺得好奇怪架啦,自從習總上場之後,一直都嚴打娼妓架啦,而家俾吳亮星講到偷渡好似去樓下搭巴士咁簡單,嫖妓仲俾佢講成去便利店叮個飯咁方便,咁即係抹黑中央掃黃不力架啫!」

筆者再補充:「其實而家中國係共產黨話哂事,連香港都係共產黨統治下既一撮土地,講真阿爺硬係要唔理啲咩香港法律,落黎亂捉人我地都冇咩符,不過就真係唔好做到咁cheap囉,係喎,李波有英國護照丫嘛,索性話佢勾結外國勢力,係特務,或者係間諜仲好喇,咁都好過而家搞到咁肉酸丫,阿爺真係要認真考慮下換過班手下,因為你果班手下既辦事能力真係差到爆。」


 吳亮星好波!

  https://www.facebook.com/onedollarchung