半季過去，曼聯究竟衰乜？（小西毒）

好耐冇寫過足球文了。

自從比阿仙奴大敗之後，曼聯嘅表現每況愈下，到近期八場不勝，要求炒LVG嘅聲音一直冇停過。半季以來，曼聯究竟發生過咩事呢？就等小弟分析一下。

新兵發揮不佳

正如小弟季初寫過一篇有關曼聯夏季轉會嘅分析，講到其實今季曼聯嘅轉會操作其實幾合理：針對性買人，價錢亦尚算合理，依架睇返，我仍然維持依個觀點。或者你又會問：咁點解曼聯依架踢到老鼠拉龜咁呢？所謂天時地利人和，你買左班球員返黎係一回事，佢同隊波夾唔夾係另一回事。迪比唔洗講啦，越踢越沉，原本寄望佢做第二個傑斯，點知風格始終格格不入；達米安嘅防守的確令人放心，但係佢嘅助攻能力一般，季初曼聯右路猶如自斷一臂就知咩事（右中場馬達其實係自由人）。

迪比啊迪比，爭氣啦好冇？我其實睇好你……

梳爾斷腳係致命傷

季初梳爾表現神勇，進步神速，前途無可限量，但就係果次受傷（果幕我依家仲記得，好心痛），打亂曬曼聯嘅部署。至今，曼聯仲未搵到一個合適嘅球員去踢梳爾個左閘位：洛祖、比連特、楊格、麥拿亞、達米安、青年軍嘅積遜，仲試過擺三後衛陣式，效果始終冇梳爾係度果時咁穩陣。而梳爾受傷同時亦影響左路嘅進攻模式。依位季初神勇嘅後生仔，助攻嘅timing配合得非常好，要知道目前LVG嘅戰術非常依賴爆破點，佢傷左之後，各位替工後上嘅能力始終冇佢咁好，唔係速度慢，就係傳中質素欠佳。

心痛嘅一幕 ：（

梳爾啊梳爾，唔知你復出之後，仲可唔可以回復以前嘅表現呢？

輪換及板凳

我之所以話阿仙奴果場係曼聯表現嘅分水嶺，其實就係見到LVG唔輪換嘅惡果。係果場之前，主力馬達、小豬、馬素、達米安都已經打左好多場，雖然話果時歐戰岩岩開始，但球員始終唔係鐵人，打幾場中途俾人換走休息下係好合理嘅事。結果呢？果場攻不銳守不穩之餘，之前表現生猛嘅馬素之後越踢越迷失（不過依個同戰術安排都有關係），達米安同馬達D表現都冇咁好，再黎一個傷病潮，真係雪上加霜。

你或者會話，受傷？咪俾D後備球員機會囉！無錯，雖然曼聯今季板凳唔夠深，但勝在LVG的確好肯用後生仔，我尤其欣賞佢比機會小弟極爲欣賞嘅佩雷拉同連加特，不過年輕球員始終缺乏大賽經驗，正路黎講有D正選大佬榜住個情況會好D。你睇係歐聯對狼堡關鍵一戰要出咁多後生仔，就知道LVG嘅輪換有幾咁失敗。

依場真係經典。

攻擊力不足同戰術排陣有關

今季曼聯嘅攻擊力一直俾人詬病，睇左咁多場波同參考左咁多球評，小弟得出嘅結論係：球員狀態係次要，問題同戰術有關。

若你有睇曼聯今季嘅波，唔難發覺LVG一字既之曰：穩——強調控球，球員企位，突破缺口主要靠中路球員嘅球場視野。依種戰術其實係歐洲大陸幾受成功，不過黎到英超效果點解咁差，原因有二：一、英超球隊強調搶截，防守時中場同後衛之間嘅空間比較細，短傳能夠發揮嘅作用有限，好難打開缺口，導致曼聯好多時只能夠係中場前十幾碼不斷橫傳搵機會；二、企位太過死板，容易防守，英國波體能好，唔怕四圍走，如果你只係企死一個位，走位唔靈活，佢完全唔怕你。其實曼聯陣中前場有唔少活動範圍大嘅球員：朗尼、馬達、靴里拉、馬素、迪比，點解唔比佢地跑動多D，傳少幾腳波呢？

老實講，做咗咁多年獌，睇住冇血性、冇拼勁嘅曼聯，的確係有D失望。

總結

今年打左半季，曼聯嘅表現的確達唔到大家季初嘅期望。不過，我個人唔建議冬季嘅時候買人，畢竟如果只係以前四為目標嘅話，陣容尚算完整，只要下放多D自由比球員，釋放球員係球場上嘅創意，表現應該會有改善。

四大原因，其實LVG只佔其中之二，但佢嘅戰術的確難辭其咎。雖然我同唔少獌睇法一樣，LVG必須走，但係離開原因同佢嘅成績無關，而係佢改變左曼聯嘅風格，依點我完全接受唔到，亦係點解我想傑斯代替佢嘅原因，而唔係傳聞中嘅摩佬或者哥迪奧拿。

作者：小西毒（本文章由聚言時報授權提供）