支持法國有乜問題？（毛言地）

FACEBOOK自法國受恐襲後就設立法國國旗嘅濾鏡比網民使用，用意係比大家表達對法國嘅祝福，但唔知點解每次有事發生大家都希望祝福嘅時候，總有人會跳出黎話世界仲有邊度同邊個需要大家支持，點解大家會無視之類……我明白世界無時無刻都有慘事發生，但若果每度有事我都要換哂頭像寫哂文喊哂口咁話人地好慘嘅話，我覺得我會變成最慘果個。唔知點解而家連祝福一個國家嘅同時你都要祝福埋世界上所有發生天災人禍嘅國家，唔係你就只係網民口中嘅一個「偽善撚」，就好似啊媽同女朋友跌落水救變個先一樣，你救邊個都比人話。其實支持法國有乜問題？唔通要大家對世事不聞不問，名符其實「攬炒」網民先會安落？

每個人都有情意結依樣野，就好似如果同時聽到日本同中國地震死左好多人，我第一時間都會講句「日本加油」先。人係有善心，但通常只會用喺自己想用嘅地方，好老實講如果世界上個個都咁大愛嘅仲點會打仗同有歧視？個個都咁有同情心德蘭修女就唔係聖人而係普通人啦。今次法國依件事都係，睇住新聞或者睇住波嘅人知道法國出左事，死左咁多人，一個本來應該和平嘅地方搞成咁，本來祝福法國係人之常情，但唔知點解網民又話「敘利亞死多十倍人又唔見你地祝福，偽善」。首先好多事新聞唔報市民就唔知，特別係中東阿拉伯果邊局勢咁亂，其次，就算報完都未必知到底係邊個炸邊個，炸死左果班係平民定恐怖份子。再者，見到法國咁慘，所以想祝福佢地都要比網民話，咁果班咁大愛嘅網民又為世界做左啲乜？捐左副身家買軍火再自組團去中東打恐怖份子？定係已經隻身去左ISIS大本營宣揚大愛精神？

我認為做善事係好睇時機，就算買旗我都會睇下自己果日有冇散銀同睇下係咩團體，唔通我買左公益金支旗出到旺角見到保良局但冇買就係冇善心？即係我只要買左一支旗我就要喺果日行哂十八區買哂每間慈善團體嘅旗先算有善心？唔好玩啦，邊個網民會咁做嘅麻煩你出黎，我唔介意對你三跪九叩，叫你一聲香港德蘭。你覺得敘利亞更需要祝福你咪轉頭像祝福人地，你覺得一味祝福冇用你咪買埋水寄比人。做善事本來就係由心出發，做到幾多咪幾多，出到多啲力咪出。而家連轉個頭像都要話人偽善，到最後大家有咩大事發生都唔再表態網民又會話人冷血！到底你點做先會啱所有網民胃口？其實冇可能。所以轉左法國旗嘅繼續轉，剪左萬事達卡嘅繼續剪，只要過到自己良心，JUST DO IT。

作者：毛言地（本文章由聚言時報授權提供）