求神拜佛保佑港隊唔好輸（曉高臣）

求神拜佛保佑港隊唔好輸，因為我唔想見到港隊球員從天堂跌返落地獄。

同事：「撲飛，你今日撲咗未？」
我：「送俾我都唔會去睇。」
同事：「你唔係好鐘意睇波咖咩？」
我：「我睇開係英超德甲西甲歐聯，唔係港超或者港隊。」

學陶傑話齋，呢D唔係崇洋，而係崇優，香港打工仔難得偷得一刻空閒，自然想做自己想做既事情，我睇波就係揀好波睇，睇完自己會好滿足果D。

數下手指，港超（港甲）賽事我睇過既唔超過十場，港隊賽事我睇過既都冇超過十場，每逢賀歲杯同英超亞洲挑戰杯，除非我好悶，正常係唔會睇。今次之所以follow港隊賽事睇下，係因為中國隊個張海報實在欺人太甚，如果冇個張海報做導火線，係咪又會有咁多人關注港隊賽事呢？我認為好多未必會睇，至少，唔會出現「撲飛」既盛況。

我個人認為，港隊忠實fans係有既，但更多人抱住入場睇熱鬧既心情先會去睇，尤其對家係享譽盛名既強國隊，好多港人自然好恨港隊可以阻強國隊出線。睇熱鬧，睇強國隊點仆低，花生友無非都係想咁，入場睇港隊，支持係得把口講下咋嘛，講到尾咪又係想睇熱鬧，情況就好似去睇一場演唱會，唔使話買過歌手既專輯先入得場，有身份證冇身份證都可以入去睇，睇下個女歌手會唔會低胸走光，睇下個男歌手會唔會show胸肌，點都好啦，睇熱鬧咋嘛。

至於我點解會話送飛俾我我都唔會入場睇，就係因為我唔想見到人地喺現場噓國歌，唔想見到人地喺現場鬧港隊，無論強國隊幾咁仆街都好，你唔承認自己係中國人都好，但人地既國歌走去噓，顯得邊個冇教養先？你話鄭智鬧葉鴻輝好冇教養，咁噓國歌又有幾有教養呢？另外，我都唔鐘意聽到有人對港隊指指點點，甚至辱罵邊個球員廢柴等等，我認為，呢場波港隊球員一定會博盡，而我地只係關注結果，咁真係冇必要入場睇，唔好帶埋d負能量入場。

香港球員近排應該好Enjoy球迷們既擁護，尤其見到好多人撲飛，個種開心係用錢買唔到既，只不過咁多人關注，自然好多人期望佢地可以對強國隊保持不敗，如果一個唔好彩輸咗，球迷到底會剩下幾多呢？

我只會網上睇直播，默默為佢地打氣，如果對佢地幾關注只係三分鐘熱度，我唔認為我配得上入場支持佢地。

唔好玩啦，喺香港生活耐咗，自然好明白咩叫熱潮，咩叫熱潮過後冇人理。

祝福港隊，希望佢地可以成功令強國隊失分。

作者：曉高臣（本文章由聚言時報授權提供）