我們只是要一年一年的紀念下去嗎？（陳假）

我都唔記得幾時講過，唔好俾雨傘革命變咗6.4咁，最後淪為口號，每年記念一次而無再實際行動。

89 6.4嗰陣，香港人都義憤填膺，有成百萬上街，當時群情洶湧，如果以當時情況，香港關閘唔做大陸嘅經濟窗口，對大陸係可以做成一定威脅，可惜當時無咁做，當然歷史係無如果，但係歷史係一個教訓，等人唔好再重蹈覆轍 。

往後幾年嘅6.4晚會，香港人都仲係上心，不過隨時間過去，香港對大陸除咗聲援，就無咩實質野做過，再過幾年之後，香港人對6.4嘅激情亦都逐年減少，幾大嘅民怨都好，無再一次起義都係會磨滅。

後嚟香港對推倒中共政府嘅威脅，更加變得微乎其微，機會嘅野唔係次次都有下次，錯過一次唔知要等幾耐。

香港嘅血依家毎日都俾人放緊，醒覺嘅香港人要做嘅係面對失敗，痛係要記住，咁先可以痛定思痛，要好好裝備自己，學多啲野又好，操 fit 自己又好，唔好俾時間浪費，將來一有機會就要好好捉緊，我地要嘅並唔係精神勝利。

如果大家覺得攰嘅，休息一下都唔係壞事，不過唔好俾藉口自己再瞓，亦都唔好沉淪悲情，咁只會令自己喪志。

作者：陳假（本文章由聚言時報授權提供）