最安全的地方，才是最危險？

POT.HK：不少人的工作求安穩，但安穩的工作又是否另一個陷阱。保持一定的競爭力，一點點的上進心，才是職場生存之道。

作者：廣告界袋底泥

阿旺一直都夢想有日可以去大公司做嘢，睇TVB d 劇大公司嘅人一般都唔使點做，係咁二拎住個 binder行來行去，同人去 pantry gossip 吓，同女主角三角戀吓又一日，仲要除咗每套都有嘅馬蹄露之類嘅醜角外，基本上全部都係靚仔靚女，加上本人比較喜愛 bbq，所以一直都好羨慕 d主角們。拍劇都已經咁完美，現實一定唔會差得太遠。

阿旺由畢業開始就俾阿媽日日鬧，「幾時先揾到份工呀」「做埋 d細公司邊有前途架」「幾時俾家用呀」聰明嘅阿旺一聽就知頭兩句根本唔重要，第三句先係重點。最後阿旺去咗間中小型公司，其實各有各好，公司 d人年紀都同自己差唔多，大家同聲同氣，返工仲玩得癲過以前返中學。

但係公司異常嘅和諧，係有原因嘅。大公司充滿爾虞我詐，大家各自為自己前途在職場上互相廝殺。阿旺公司嘅員工就一堆爛泥咁，毫無上進心，每日返工都係睇廉航 mark假期請 no pay，公司給予晉升嘅機會仲會苦惱足幾日，諗點樣拒絕會禮貌 d，每個人都自願做返一個普通嘅薯仔，所以完全利益上無任何衝突，和諧到一個極點。

工作氣氛係輕鬆自在嘅，但最近阿旺都開始擔心，自己會唔會就係咁俾一個過於舒適嘅環境薰陶成一隻動物園飼養嘅無牙老虎，失去謀生能力，失去當初所擁有嘅衝勁同夢想，甘於就咁每日過住安穩嘅日子，就咁就一世。