打份好工。鬼唔想咩？不過個個打工仔都梗係有d 對公司的不滿。例如長期要OT，同事間好多是非，人工唔夠高，星期六要返工咁。有人同我講，好工不如好老細，冇錯架，冇個仁慈的米飯班主，又點值得大家咁努力工作呢。好老細當然唔會得一個特質就夠啦，除左心地善良，唔會出毒箭之外，仲要有氣度，有智慧。
聽過有間公司，家族式經營，老細係家族二代。每個員工，上至管理層，下至倉裡面個執貨，都係老細親自見工的。「下？乜間公司好少人架，咁見法老細咪好唔得閒？」呢個老細偏偏就係鐘意咁樣逐個同你傾，傾下你份人工，問下你個理念咁，睇下你適唔適合佢公司，有冇機會做得長。因為生意之道，其中一樣就係留住人才，流動性低d ，對公司黎講，係有利的。不過，呢個應該只限於公司核心員工，亦即係管理層，而唔係全公司，包括埋個兼職清潔阿姐。
做唔做得長，有冇樣睇？我諗都有d 線索嘅，例如佢之前的工作履歷，同埋人的性格、年紀。成熟D，個人就多數坐得定D。「咁做得生意，都預左有人轉工架啦」No！呢位老闆，有種固執，就係唔鐘意人辭職。一旦你辭職，不管你係咪small potato都好，佢都會召你入房，同你傾一陣計，呢個一陣，可以係十五分鐘，亦可以係由午飯後傾到收工前十五分鐘。「為乜要傾咁耐，傾收購價咩？」嗯，如果真係同你講錢都仲好，不過佢係同你講心。
「入左公司2年喇，時間過得幾快喎，點解唔做呀？係咪搵到份新工？」我諗，冇乜邊個打工嘅，辭左職會想同老闆傾心事的。「係呀係呀，搵左份新工，做到今個月尾last day」「嗯嗯嗯，而家公司請人好困難，如果，我係話如果，搵唔到人交接你手上的工作，不如你繼續留低啦，當係幫公司，可以嗎？」呢個世上，除非我發現你係我親生老豆，若果唔係，我諗唔到理由放棄外面一舊肥豬肉而留低。
「難辭職」係呢間公司獨有的文化。每個員工，「堅持」辭職後就會變左家族裡面最唔受歡迎的人。呢一個月的通知期，老細會同其他同事講，「唉，Joyce的工作能力真係好差，做野手腳慢，跟唔上公司的節奏」；假如阿Joyce係大家眼中係又精明又能幹的話，老細就會話：「唉，真係不幸地，Joyce身體有事，要做個大手術，有排休養，下星期搵人pick up 佢d 工作啦。」
我就話，唉，你做到咁樣，點叫我唔搵過第2個老細呀？
