大肚婆在公司裡，係唔炒得的。
《性別歧視條例》規定，僱主唔可以因為女同事懷孕而給予她較差的待遇，或者將佢解僱。產假復職後才解僱？都係唔得。要炒人，就要老闆証明個女同事的工作能力不達標，但完全唔關個肚事。咁即係點？即係佢大左肚，工作能力退步，公司認為佢做得差只係咁啱啱在呢段懷孕時間。「大肚前表現OK，大肚後唔OK﹐，完全客觀，百分百唔關懷孕事。」嗯，我都唔識講。
話說公司入面有個女同事Gigi最近就係有了呢個免死金牌。本來佢同個女上司向來唔啱嘴型，工作已經好多磨擦，但係諗到大住個肚點轉工，就唯有忍多一陣，等埋個B出世，再作打算。Gigi有咗BB，要請假去做產檢，好正常，即使佢個惡頂女上司幾唔願意，都冇得唔俾。「Gigi，我覺得你拎兩日假去醫院檢查，好影響工作進度喎，你又唔係唔知個Project 有幾趕，2日真係too much 喇。」Too Much？咁即係唔批嗎？「我去產檢喎，醫院通知我要2日！」Gigi個性格就係咁硬，產檢幾多日係唔需要討論的，難道你覺得太多就會變做1 日嗎？「Gigi, 我生過3個，每次去醫院都係半日搞掂，我唔明你點解要2日咁多。」Oh sorry, 原來再討論落去係會變成0.5日。
討論完，兩人都唔妥協。咁女上司唯有不情願咁俾Gigi放假，不過佢話個Project 始終都要Deadline 前起貨，即係假係有得放，但係要做哂今個星期d工作。老細呢句真係無敵，Gigi都心裡有數，幾日加班走唔甩，不過腹大便便，應該會有些同情分。「Gigi，你大左肚，唔好加班，早d 收工回家休息，d 工夫留返星期四做啦。」星期四，九月三日，今年個新勞工假啊，一假換一假，紅日返公司做野，慘過平日加班。Gigi無反駁，女上司就笑笑口，大概佢覺得自己呢個安排真係唔錯。
究竟Gigi 星期四有冇返工？就要查一下HR 的紀錄先知，不過可以肯定既係，原來免死金牌，係擋唔到d刀刀劍劍架。
