創業五年後

「過去」

時間真係過得好快，不經不覺原來今日係自己公司成立嘅第五個年頭。過去五年做咗啲乜？好似好多都同公司無關，因為終於有時間讀返個大學學位返嚟，由準備結婚到結婚，去完渡蜜月準備要小朋友到郭大少仲有唔夠二十日出世，等等。至於公司方面就係起起跌跌，自己犯咗無數嘅錯，做咗好多唔知啱定錯嘅決定，希望同期望相差越嚟越遠。

「現在」

你問我公司捱到五年開心唔開心？我真係唔知，因為想做好多嘢但係好似樣樣都無達標。可以怪邊個？當然係自己！五年過去我得到啲乜？我真係唔知。當然有得必有失，世事盡能完美。我只可以話呢條路行咗五年，又係到咗分叉口嘅時候。因為最主要係到咗自己嘅目標期限，真係眨下眼就過咗五年。回想其實自己係唔係做老闆嘅材料？我真係開始質疑！

「將來」

無人知將來會點，但係自己承擔風險嘅能力係會因年紀已慢慢下降。或者你唔認同，因為好多人都好遲先開始。所以繼續堅持？定係放棄？嚟啲問題係過去幾個月不斷重複又重複，無人可以幫到你。雖然見到好多令人振奮嘅消息不斷出現，但係自己就覺得越來越迷茫。路雖然係自己揀，有時仲要好自私，要認真諗下繼續去「開天闢地」，「修橋補路」定係「止蝕離場」。