學咗詠春，都唔識話比人聽！

當問起學咗詠春嘅人，詠春究竟係啲咩嘅時候，通常只會話比你聽:「埋身短打, 日字沖拳」等。唔通咁就能代表詠春這一種拳術嗎？感覺上就好似聽到「有鬍鬚就係男人，長頭髮就係女人」此等說話一樣，流於表面。

何謂詠春？詠春主要有三樣特點，而呢三樣最能代表此拳術，亦能夠將詠春同其他武術區分出來。

第一，詠春嘅理論科學化及極具邏輯性，講求「中線 朝形」。 簡而言之，就係盡量保持雙手緊密嘅互動，以策動攻擊或反擊動作，攻打對方人體弱點，亦即係眉心、人中、喉嚨、氣門以至下陰，呢啲部位都係處於人體中線上。另外為咗確保雙拳能同時打擊同一距離，身軀必須正面朝向敵人，亦即朝形。呢樣亦係詠春與其他功夫不同嘅地方。

第二，詠春嘅發力方法「寸勁」，寸勁係一種特殊嘅發力方式，可於短距離，什至是零距離嘅情況下，透過肌肉嘅收縮及關節嘅伸展，併發出爆發性嘅力量。而呢種力量係直線而帶有穿透性，彷彿一粒子彈能射穿人體一樣。呢種發勁方法係需要後天努力鍛練才能得到，並不是與生俱來。最後若能將身體每個關節，包括腳腕、膝、腰、肩、肘、手腕、依次序同時發勁，所併發出嘅爆炸性力量更是無法估計。

第三，詠春獨有嘅訓練方法「黐手」，點樣先算係黐手，用手觸碰對方橋手就叫黐手嗎？我認為黐手有三個元素。第一，必須與對方橋手雙接，即係自己其中一隻手能觸碰著對方橋手。第二，於橋手雙接嘅時候，感受對方嘅力量流向，若果對方展開攻擊，正因為觸碰著對方，就算對方出招快如閃電，但因為觸覺比視覺更快，我們仍能感知到對方正想襲來，從而作出反應。第三，跟據對方嘅力量流向，採取相應嘅攻防動作，以達致消解對方攻勢。達成呢三樣元素，才算得上是黐手。

總括而言，詠春理論既科學化又極具邏輯性，講求「中線及朝形」； 另獨有既發勁方法「寸勁」，令詠春門人能於極短距離併發出無可估量嘅爆炸性力量；最後「黐手」練習，令佢地每次對敵嘅時候，能更快地洞悉對方攻勢，從而採取相應的攻防動作。