作為一個孤單既創業人，我堅唔知我兜踎緊果時有幾多人真係會在身邊真心支持我，而唔係向我背後講三講四；見面果時可能會問下，「喂！你公司點呀？生意OK嗎?」。我回應，「OK啦，岩岩起步叫麻麻地啦，頂得住既。」你一行開同其他人講，佢公司生意好似麻麻地喎，佢有冇問你地借錢呀。有冇誇張？哈，你自己感受過便知一二。
好啦，當你捱左幾年後，公司慢慢上左軌道啦，朋友總係會老闆前老闆後咁稱呼你，驚死條街冇人知你攪生意，攪到個個以為你好疊水咁，如果我係李家誠我堅唔介意你講，老實我都係泥菩薩過江，搵朝唔得晏，正所謂人怕出名豬怕肥，豬肥就要被劏，最怕就係肥都未肥過就比人劏左果下賴野。我又試過比D唔太熟既衰人開聲屈請飲野，食飯呀咁，最終無論你請與推都係輸家。請就比錢，推就話你孤寒。老實食果餐飯每人果一百幾十，自己冇錢比咩？（冇錢咪出聲我請你食一餐半餐有咩所謂者，一係你係靚女，比我扮下尖頭民）好明顯係貪下小便宜，yo下你佢又冇蝕低既。唉，但結果通常都係一呼百應，所以呢D失左控既群眾運動而且確係好得人驚，好似紅衛兵來抄家咁。及後我都好少同初相識既人（如果唔係生意人活動果類）話我係攪生意既，都係求其講話做個Sales仔就算。
好啦年尾又近啦，大家一定收好多炸彈。作為老細，無論你公司幾細，去飲做公價，都真係會驚比人講家，又老實喎，十年都冇見一兩次，你想我比幾多呢？記得有一次朋友食派貼飯果時，大庭廣眾兜口兜面講，拿你老細人情做Double呀！我老實不客氣，喂大佬，我又唔係你老細，你想我比幾多既Double丫？我接住再講，交情幾多比幾多啦。當大家dead air之際，有個較識趣既朋友見唔對路立即扯開話題。重記得果日去到酒樓，個朋友搶MIC大聲講，喂老闆埋黎影張相先，妖！$%^**&又黎呢家野？經此一役，唔熟既人結婚我都盡量唔去。老實講，我搵幾多關你鬼事咩，搵得少唔夠食果時，你唔見你問候下我，救濟下我？我一向做人情既方式係交情幾多比幾多，而唔係我搵幾多比幾多囉。如果收到我所謂公價人情既，你自己知咩事啦。
有時，我都真係會諗，係咪我遇人不淑呢？
創業講呢D：有苦自己知朋友篇
