【食譜】玫瑰茶香燻雞脾

之前見到有網友仔整左個玫瑰茶香燻雞， 見好似幾簡單， 加上我又大批入手左好多花茶， 材料有齊晒， 咁就一齊學下整啦~

原本係用整隻雞嚟整， 不過話晒都係第一次， 唔知成唔成功， 所以我就用左四隻新鮮雞脾嚟整啦~

雞脾先洗淨瀝乾水， 然後用 1湯匙生抽﹑2湯匙老抽、2茶匙玫瑰露及2茶匙砂糖拌勻， 淋在雞脾醃大約半小時~

將雞脾隔水蒸20分鐘(視乎大小)~

然後再熄火焗5分鐘~

然後在鑊中放入錫紙， 倒入燻料: 潽洱茶葉2湯匙﹑玫瑰花茶 約20粒﹑冰糖5-6小粒及生米 1杯~

以蒸架盛起雞~

開中火煮燻料至冒起白煙，加蓋熄火焗三分鐘~

放涼後就可以斬件上碟， 食得啦~

開頭仲驚好難整， 原來燻雞就係咁簡單， 成個過程我最緊張就係燻嗰個步驟， 因為好怕會燒燶隻鑊呀！ 不過我依個驚心又真係過份左， 煮完之後隻鑊絲亳無損呀！

味道方面我又覺得用依個方法煮雞睥， 啲肉好滑， 入口唔錯呀！ 唯一我覺得就係個玫瑰茶味唔太濃， 我想如果可以燻多五分鐘， 咁就會入味啲， 應該仲好食呀！