我最期待的荒謬畫面

「亞視」執行董事葉家寶出席「無線」新聞節目講清講楚，表示過年前要籌集至少三千萬元才可維持運作。

我心諗：WTF？你唔係開電視台架咩？

香港回歸以來，荒謬反智的畫面實在多不勝數，大部分香港人包括我自己都已經睇到有尐麻木，不過今次葉家寶上TVB嗌救命，係挑戰緊亞視員工對自己專業的尊嚴，係突破沉淪的底線。

即係咁，如果你本身係一位名作家，江郎才盡搵新人代筆，隱瞞讀者，我仲可以有半分同情及理解，不過亞視今日的行為，就等如公開搵另一位名作家代筆，然後面不紅耳不熱咁同大家講：「我係好唔掂架啦，擺明搵我對家幫手架啦，吹咩！」。

亞視與無線原本並不是如此強弱懸殊，大家擁有相同數目的頻譜，今天淪落到不能靠自己的廣播平台發聲，亞視員工情何以堪。

當然，底線嘅嘢有別於處子之身，可以一破再破，最後你要問問自己樽鹽還值幾多錢。