玩具迷珍藏Show 2015

純粹路過抱著辜且一睇既心態，睇宣傳海報便一直唔相信係咩珍藏Show，一早認定係一個散貨場，心態正確下唔會失望，反而隨時會有驚喜。展期：2015年2月14 - 15 日，1：00 pm - 7:00 pm。

行完一圈呢個散貨場，有個感覺，唔知係咪近中旅社和中港巴士站，期間亦有國內朋友參觀選購，可能佢地銷費能力高啦，有啲貨都標得幾貴，但又聽到有師兄問價時，老闆二話不說已大幅度減價（$2,200減到$1,600），所以大家想買嘢真係要還吓價。



另外有啲驚喜係，好多中古合金散貨，價錢都OK，又可以拎上手研究吓，好過淨睇櫥窗；另外又有好多膠品，有啲少殘又一兩百有交易，唔介意既都係入得過。我就以低價$300入咗對天地雙龍膠魂，等佢地好耐。

最大驚喜係，Action Toys竟然有展出攤位，好進取，唔做隔住展示櫃，直接搵手摸都得；Repainted既EX 新三一萬能俠，除咗唔同顏色外，另加送獸化頭，訂齊三隻送既特典又唔同咗；除咗EX巨靈神，御用UFO亦有實物，一樣可以合體，預售日期為2015年尾；ES合金三一萬能俠一號已炒上天價，好消息係將會推出新版，已有灰模展出，未買既師兄可考慮呢隻，唔使捱貴貨；而六神整體都好大隻，暫時睇灰模，好似都唔錯；另雷登亦有展出，睇完實物後，我知自己走唔甩架喇...！