港漫中的參考元素

港式漫畫畫法首推黃玉郎，加埋競爭對手上官小寶相若既繪畫手法，一度成為後輩的模仿對象，影響港漫日後既發展，所以玉郎二徒弟張萬友後來繪畫既龍虎門新傳，似足黃玉郎，亦難怪後來佢可以成為舊龍既主編；至後期馬榮城既冒起，以一種全新既演繹手法編繪，再配以水彩，水墨，掃描，毛筆，國畫...等深厚技術，將畫面推向史無前例咁靚，亦成為新一代既漫畫家模仿對像，一般亦會以“寫實“和“港式“區分。

另一方面，日漫在港漫發展史中亦佔很重要的位置，日漫（翻版）不單伴著香港人成長，連香港漫畫家亦肯定深受其影響；黃玉郎既玉郎傳甚少提及佢細過睇咩漫畫，但往後一代漫畫人就經常提及自己對日本作者的推崇及所擁有的珍藏，即使強如馬Sir，早期作品中，如風流，五兄弟...，亦滲透著日漫愛與誠嗰種感覺。

每個漫畫人成長過程中，搵啲好嘢參考吓無可口非，所以每個漫畫人既工作室，參考書都係海量收藏。今次同大家分享吓一啲幾有趣既“參考“例子。

肥良和馬Sir有牙齒印係公開既秘密，當年肥良既天煞狂刀，一幅似曾相識既構圖，被相信係馬Sir粉絲既人在傳媒中作出指控，認為肥良“參考“馬Sir，但即時遭到肥良既連消帶打作出反擊，表示自己係法國畫家Frank Frazetta 既Fans，構圖係參考佢既作品 The Destroyer，再串埋馬Sir Fans 唔知偶像都要“參考“人。

初代街頭霸王主筆許璟琛，當大家都擔心，如何從Q版轉型畫寫實時，街霸出街確實眼前一亮，但睇落...熟口熟面既？當時日本漫畫家池上遼一正紅透日，港，台，爆紅作品多不勝數，傷追人，淚眼煞星，英雄本色...，本本都大賣，從許璟琛既作品中，有理由相信佢都係池上遼一既小Fans，只因街霸既構圖，面相，角度...都好池上，池上老師或許可稱寫實派許璟琛既啟蒙老師。

池上遼一既英雄本色絕對係佢既代表作，只係估唔到，人氣角色渡海哥，會被牛佬重金挖角，跳槽到古惑仔做大飛哥...！

邱福龍係我一個好欣賞既漫畫家，最喜歡既係佢作品當中的構圖，透視和姿勢，相信佢都有參考一啲他人作品，但從睇漫畫既深厚閱歷中，和龍哥神交咗廿幾三年，從佢分享既創作點滴中，佢參考得最多既，應該係自己，從武功招式，到姿勢構圖，不時親身上陣做 Model，拍成照片作參考，呢啲咪叫做 Heart 囉，抵佢今時今日仲賺到我錢。