C3 in Hong Kong 2015 (C3= Characters + Cultural + Contents)係香港唔知舉辦過幾多屆，但對我來講係第一屆，第一次入場，現場氣氛十分熱鬧，在這裡，玩具迷，電玩迷，扮嘢迷都會搵到自己既世界...！
入場面前第一個場館 ~ Tamashi Nations，原來SUPER ROBOT不經不覺已五週年，場中展出過往已出產品，進行一次簡單的五週年回顧，幫助各位師兄整頓心情，重新上路...，所以那邊箱已同步展出宇宙大帝，恭迎大家邁向新一天，再供養SR另一個五年。之前曾提及的新戰線，Mental Robot 魂亦有兩副展品，好彩唔係我杯茶。
同場Bandai亦有很多展品，以動漫人物為主的景品公仔為主，稍為啱我既只有龍珠和模型產品。
最近巴魯坦和超人老母週圍攪事，就係同佢地有關，會場中唯一與超人相關既產品；最緊既係，身高連地台約2米高，有證書全球限量各50隻既巴魯坦和超人迪加，分別售價為$98,000和$88,000，我幾咁鍾意巴魯坦都卻步，唯有28／2去希慎廣場睇吓止渴了事。
另一間較多嘢睇既係Action Toys，會場中展出咗兩大隻Transformer外，好多預售產品都有實物展出，估計應該可如期推出。EX 巨靈神已有實物睇，感覺和官圖差不多，設計上沒三一萬能俠所帶來的震撼，買唔買有啲保留；至於之前未買又想買新三一既朋友，除咗上Y拍搵之外，又多個選擇，Repaint版即將上市。至於ES 高迪安、黃金俠、怪物小王子、小雲、小寶寶、宇宙大王、真三一、恐龍探險隊等等已有完成品睇，之前有灰模既超獸機神依舊係灰模，但最欣喜既係，之前只設計圖既六神合體，亦已有實體灰模展出；剛開訂既金剛飛天鑽實物，由尺吋到配件，個人都好鍾意，稍後要快手訂返隻先。
呢間公司出咗批 1：1 平成拉打變身腰帶，手工像真度都好正，可惜老餅始終昭和先係皇道，可以Pass。
會場入面我搵到兩處最多靚仔既地方，其一係Card Game售賣攤位和Card Game 戰鬥場，對呢樣咦完全無興趣，亦唔識玩，又Pass。
第二度多靚仔既竟然係呢檔嘢，啲Figure隻隻波大欏大，靚仔睇到目不暇給，幾乎要貼上PG家長指引咁濟。
無論咩節，Cosplay都不可或缺，老實講，扮演者衣著落足本錢，有啲影完相仲派張卡片俾我添，但問題係好多扮演者本身本錢不足，或扮錯對像，好似未入會場撞到個未發育既妹妹扮...藝妓，即時滴汗！但點都好，我地都應該尊重演出者，有啲相我唔放上來喇...！
明天是最後一天展期，未去又想去既，食完晏好快啲入場喇！
