【兩日一夜小旅行】數碼港艾美酒店家庭住宿體驗

我地嚟數碼港艾美酒店除左參加Halloween Weekend Brunch(按此重溫)，其實我地仲係酒店借宿一宵，開開心心玩左兩日一夜，由酒店房間到附近環境都真係絕對唔錯，小小豬就緊係超興奮啦~

今次我地係入住家庭住宿房，小小豬一打開門佢就嘩嘩大叫，因為房間真係好寬敞，仲有一邊係專為小朋友而設嘅小玩樂區添~

依隻小小豬一入到房就急不及待咁跳上床，仲抱住一早係床上等緊佢嘅BEAR BEAR不停傻笑...哈哈哈~

當然另一個令小小豬心心眼嘅就係依個小玩樂區啦~

係個小帳篷入面左碌右碌，都不知幾興奮~

之後仲扮大爺咁舒舒服服坐係梳化上，佢話要靜靜地欣賞靚風景~

其實唔止小小豬，我都覺得由房間望出去個景真係好靚，一望無際嘅海真心覺得好舒服，十個正呀~

今次入住嘅家庭套房唔止房間大，就連浴室都好大呀~

不過小小豬就對浴室內嘅兒童浴缸非常有興趣，仲係浴缸上玩左一個開心浴(大個仔啦...唔可以再影出浴照...所以大家幻想下小小豬拎住個海馬花灑周身淋啦...哈哈哈)~

值得一讚房間為小朋友小朋友提供兒童牙刷、沖涼套裝同埋拖鞋，非常貼心呀~

係房間休息一陣，小小豬都忍唔住要即刻換上泳裝，嚟一個捉緊夏天的尾巴，去泳池游個痛快~

游完水都未放夠電，我地就去左酒店附近嘅海濱長廊行返轉~

由於我地都係即慶嚟，所以都冇帶任何玩具嚟玩，不過依度真係好舒服，只係簡簡單單咁行下、坐係海邊吹吹海風，成個人都輕鬆好多呀~

雖然我地Lunch食左一個超豐富嘅Brunch，不過玩左成個下午，都係係要去補充體力，所以我地就嚟到酒店嘅中餐廳南坊，食左一個既富豐又好味兼有驚喜嘅晚餐~

頭盤就係「蒜片牛柳粒」、「椒鹽鮑魚」同埋「招牌黑毛豬叉燒」，其實三樣都係水準之作，不過對黑毛豬叉燒就尤其喜愛，肉質淋軟得嚟唔會太乾身，而且好Juicy，真係食唔停口呀~

「京滬生煎金麻黑白包」依個可以話係小小豬全晚第二至愛，以行動証明，因為佢一個人食左兩大個呀~

「川式麻辣小籠包」依個絕對係有驚喜，包包內充滿惹味嘅高湯，一咬開嗰一陣麻辣高湯就湧入口，雖然帶有麻辣但唔會好搶喉感覺，滿足...滿足呀~

「羊肚菌花膠螺頭湯」作為一個愛飲湯嘅人嚟講，依啖湯真係超清甜，完全唔覺得油膩。而且每碗都有大大片花膠，真係好味都唔識形容呀~

依隻小小豬就緊係飲得津津有味啦~

「龍蝦湯燴蟹鉗」蟹鉗非常爽口彈牙，龍蝦湯底好濃稠，加埋置底嘅讚岐烏冬一齊食，好惹味~

「禪關萬象」其實依個係一味素食嚟，以原個去皮番茄釀入唔同珍菌，再用米水打成泡沬伴係番茄旁，睇個樣都覺得好特別。有外觀亦有內涵，珍菌都好夠味而且入口又有層次，估唔到一向唔鐘意食菌類嘅小小豬都可以一個人食晒成個，仲話係今晚至愛嘅菜式嚟呀~

「海膽炒飯」見到咁大片海膽，對於我依啲海膽控真係未食都已經好興奮啦~

甜品時間我就嚟一個「楊枝甘露」、「招牌黑白芝麻卷」及「爆炸大良脆奶餅」~

小小豬兩父子就嚟依個「西瓜西米露」、「招牌黑白芝麻卷」及「爆炸大良脆奶餅」，小小豬除左對西瓜有興趣之外，佢仲對啲爆炸糖極為喜愛，就連我嗰啲都搶埋嚟食呀~

其實今個晚餐真係勁有驚喜，因為酒店俾我感覺都係以西餐為主，真係冇諗過佢地嘅中菜都可以咁有水準，而且仲好有特式，所以我地三口子都食得超滿足呢！

食飽飽依隻貪玩豬就當然返房間繼續，成晚躲係個小帳篷入面，如果可以佢話好想係入面瞓埋添....哈哈哈~

一覺醒來就當然係早餐時間，住宿套餐係包埋自助早餐，所以我地就去了Prompt餐廳享受一個豐富早餐。

有左早前嘅Brunch嘅經驗，都對佢地嘅早餐有一點期望。估唔到又真係幾好，食物嘅種類都好多樣化，中式同西式都有，而且仲好有水準添。

小小豬最開心嘅就當然係果汁同益力多無限飲啦~

依個特式牛角包絕對係我個人心水推介，牛角包加面上加入菠蘿包皮，食落超有口感，我都唔客氣咁食左兩大個呀~

當然仲有一系到精緻小蛋糕，平日嘅我都好少食蛋糕，不過今次都忍唔到口，食左好多呢~

成個環境同食物都真係唔錯，所以唔覺唔覺我地都食左差唔多兩個鐘早餐(嚟酒店就係要慢活HEA一下嘛)~

依兩父子話佢地真係好唔捨得個VIEW，坐係窗旁唔願走呀~

輕輕鬆鬆咁就過左兩日一夜，真心鐘意酒店整體嘅環境同埋配套，大人小朋友都玩得開心又Relax，真係可以既為心靈上叉叉電，又可以有一個美好親子時光，唔怪得早前朋友入住後對讚不絕口！

More Information : 

「家庭同樂住宿套餐」

- 入住智能客房一晚 

- 小朋友房內佈置 

- 1 張加床或為小朋友打造的小帳篷 

- Prompt餐廳自助早餐3位（2名成人和1名12歲以下兒童） 

- 成人於Prompt餐廳用餐，孩子免費用餐 

- 澳洲品牌baia baia時尚拖鞋一雙 

- 延遲退房至下午2時 

**中餐廳 南坊 用餐需另行收費

預訂: https://myclubmarriott.com/en/member-offers/happy-child-happy-family-staycation-room-package