歌手蘇慧恩(Ophelia)邀請到歌手鄭世豪(細龍生)一齊開直播,直播當中有不少粉絲點播電視劇《開心速遞》主題曲,由於沒想到反應咁熱烈,Ophelia自覺這首歌未練得太好,直播時沒有演唱,直至live結束後,Ophelia馬上練歌,之後兩人在徇眾要求下合唱了《開心速遞》主題曲,並錄下合唱片段放上網送給粉絲們。
鄭世豪表示識咗Ophelia咁耐等一次合唱,好佩服她堅持做音樂,所以她說開直播,好想參與一下,「見佢好努力咁開過兩個演唱會,我都好希望自己搞番一個個人演唱會,不過嚟緊出咗首新歌先,而之前出咗首《Copy and Paste》網民都好鍾意,因為反映到打工仔心態,好寫實,下一首歌希望可以今年年底或下年頭推出啦!」
蘇慧恩亦開心表示:「 live 嗰陣有啲人點播《開心速遞》主題曲幾次,世豪話難得姪女又響度,你男友又响度,真係一家親,不如你快啲練下首主題曲,咁我就即刻練下首歌,因為第一次唱,初初都有啲擔心,不過夾咗一陣就越唱越輕鬆自在,佢姪女又好投入咁拍手掌,之後我地錄咗送俾網民!好多謝世豪肯過來live , 知道佢平時好忙,今次佢仲教咗我一啲開live 秘技,真係獲益良多。」
Ophelia羡慕表示好想好似世豪咁拍下劇唱下歌,如果做到一個角色可以市民大眾都認得既話,真係會好有滿足感。